कास्की –पोखरा–१९, लामाचौरकी १३ वर्षीय किशोरीको शव शुक्रबार साँझ भेटिएको छ ।

बिहीबारदेखि बेपत्ता पुष्पा केसीको शव नांगो अवस्थामा भेटिएको प्रहरीले जनाएको छ । लामाचौर फापरतरो स्थित शैलजा स्मृति पार्कको डिलमुनी झाडीमा स्कर्ट खोलिएको अवस्थामा केसीको शव भेटिएको स्थानीयवासीले बताएका छन् ।

शव शनिबार पोखरा स्वास्थ्य विज्ञान प्रतिष्ठानमा  पोष्टमार्ट भएको छ । अस्पतालले पुष्पाको टाउकोमा रगत जमेको, देब्रे छाती, फोक्सोमा चोट लागेको र देब्रे खुट्टाको कुर्कुचा भाचिएको जनाएको छ । पोष्टमार्टको पूर्ण विवरण भने आइतबार मात्रै आउने अस्पतालले जनाएको छ ।

कास्कीका प्रहरी प्रमुख ओम रानाले हत्या वा लडेर कसरी मृत्यु भयो भन्ने बारे नखुलेको बताउनुभयो । स्थानीयले बलत्कारपछि हत्या भएको बताए पनि पोष्टमार्टमामा बलत्कार भएको नदेखिएको अस्पताले जनाएको छ ।

विन्ध्यवासीनी माविमा कक्षा ६ मा अध्ययनरत पुष्पा बिहीबार साढे ५ बजे विद्यालयको बसबाट घरभन्दा झण्डै २ सय मिटर तल तरकारी किन्न भन्दै झरेकी थिइन् ।

साझँसम्म घरमा नआएपछि बिहीबार साँझबाटै परिवार र स्थानीयले उनको खोजी गरेका थिए । उनको झोला भने केही पर चौतारोमा भेटिएको थियो ।