स्याङ्जा – राष्ट्रिय आविष्कार केन्द्रले वैकल्पिक प्रविधिबाट मिनी अक्सिजन प्लान्ट निर्माण गरी सोमवार स्याङ्जाको भीरकाेट नगर अस्पताललाई हस्तान्तरण गरेको छ ।

महावीर पुनको नेतृत्वमा सञ्चालित राष्ट्रिय आविष्कार केन्द्रले नेपालमै पहिलो पटक मिनी अक्सिजन प्लान्टबाट अक्सिजन उत्पादन गर्ने प्रविधिको परीक्षण सफल भएपछि भीरकोट नगर अस्पताललाई हस्तान्तरण गरेको हो । नगरपालिका र आविष्कार केन्द्रको संयुक्त लागतमा याे प्लान्ट निर्माण गरिएको भीरकोट नगरपालिकाका मेयर छायाराम खनालले जानकारी दिनुभयो ।

कोभिड १९ को दोस्रो भेरियन्टको सङ्क्रमण फैलिएको र अक्सिजन सिलिन्डरकाे अभाव भइरहेको बेला आविष्कार केन्द्रले वैकल्पिक प्रविधिबाट मिनी अक्सिजन प्लान्ट जडान गरेकोमा मेयर खनालले आविष्कार केन्द्र र महावीर पुनलाई धन्यवाद ज्ञापन गर्नुभयो ।

झन्डै २० लाख रुपैयाँमा याे प्लान निर्माण गरिएको आविष्कार केन्द्रका मेकानिकल इन्जिनियर रितेश देवले जानकारी दिनुभयो । मिनी अक्सिजन प्लान्टमा सात वटा अक्सिजन कन्सन्ट्रेटरलाई एसेम्बल गरी ६५ लिटर प्रति मिनेट अक्सिजन उत्पादान हुन्छ । जडान गरिएको अक्सिजन आवश्यकताअनुसार प्रेसर थप घट गर्न सकिन्छ । 

आविष्कार केन्द्रका अर्का बायोमेडिकल इन्जिनियर उमेश किराँतले यो प्रविधि अब देशका विभिन्न ठाँउमा जडान गरिने जानकारी दिनुभयाे ।