कास्की – पोखरा लामाचौरकी १३ वर्षीया पुष्पा केसीको शव ५ दिनपछि परिवारले बुझेका छन् । 

प्रहरीलाई अनुसन्धानमा सघाउने गरी आफन्तले बिहीबार शव बुझेका हुन् । 

आफ्नो संस्कार अनुसार काजक्रिया गर्दै जाने र अनुसन्धानमा सत्य तथ्य खोजी गर्न आफुहरुले संघर्ष जारी राख्ने गरी शव बुझेको केसीका आफन्त बुद्धी खत्रीले जानकारी दिनुभयो । 

‘हत्या, आत्महत्या के हो भन्ने निक्र्योल नभएसम्म संघर्ष गरिरहन्छौं,’ खत्रीले भने, ‘हामीले प्रहरीको अनुसन्धानलाई सहयोग पु¥याउनको लागि शव बुझेको हो’ ।  
शवमा गन्ध आउन थालिसकेको र घटनालाई अन्य समूहले अतिरञ्जित बनाउन खोजेको बताउँदै घटनालाई अतिरञ्जित हुनबाट जोगाउन र प्रहरीलाई पनि अनुसन्धानमा सहयोग होस् भनेर शव बुझेको स्थानीय बमबहादुर गुरुङ्गको भनाई छ । 

बाटुलेचौरको बिन्ध्यवासिनी माविमा ६ कक्षामा अध्ययनरत उनी शुक्रबार घरभन्दा साढे दुई किलोमिटर पर मृत भेटिएकी थिइन् । 

घटनाको बारेमा छानबिन गरी दोषीमाथि कारबाही गर्न कुनै कसुर बाँकी नराखी अनुसन्धान गरिरहेको जिल्ला प्रहरी कार्यालय कास्कीका प्रवक्ता तथा डिएसपी रविन्द्रमान गुरुङ्गले बताउनुभयो ।