धनकुटा – धनकुटाको छथर जोरपाटी गाउँपालिकाले गएको बैशाख २ गते असिनाबाट तरकारी तथा बालीनाली क्षति भएका किसानहरुलाई राहत र अपाङ्गता भएका व्यक्तिलाई सहयोग गरेको छ ।

पालिकाले ३० औँ अन्तर्राष्ट्रिय अपाङ्गता दिवसको अवसरमा हिजाे एक संयुक्त कार्यक्रमको आयोजना गरेर ६७ किसानहरुलाई नगद राहत र २८ अपाङ्गता भएकाहरुलाई नगद र यन्त्र सहयोग गरेको हो । 

पालिकाले तरकारी खेतीतर्फ पूर्ण क्षति भएका २२, आंशिक २०, सामान्य २३  र धान बाली क्षतितर्फ २ परिवारलाई राहत दिइएको पालिकाका सूचना अधिकारी नेत्रबहादुर श्रेष्ठले बताउनुभयाे । पूर्ण क्षति भएका किसानलाई नगद १५ हजार, आंशिकलाई १० हजार, सामान्यलाई ५ हजारका दरले र धान बाली क्षति भएका १/१ परिवारलाई क्रमशः ५ हजार र ७ हजार ५ सय रुपैयाँ गरी ६ लाख ४२ हजार ५ सय रकम बराबरको राहत वितरण गरेको छ ।

यही अवसरमा १६ जना अपाङ्गता भएका व्यक्तिहरुलाई श्रवण यन्त्र र १२ जना अपाङ्गता भएका व्यक्तिहरुलाई आर्थिक सहयोग प्रदान गरिएको छ ।