डाेटी - अदुवाको मूल्य नपाएपछि सुकाएर सुठो बनाउँदै गरेका डोटीका किसान वर्षा र हिमपातका कारण समस्यामा परेका छन् ।

लगातारजसोकाे वर्षाका कारण सुठो सुक्न नपाउँदा कुहिने जोखिम बढेको छ ।आफूले गरेको मेहनतअनुसारको मूल्य नपाएपछि अदुवा सङ्कलन गरी गाउँमै सुठो बनाउन थाले पनि वर्षाका कारण सुठो सुक्न नपाउँदा कुहिने अवस्थामा पुगेको बडिकेदार गाउँपालिकाका किसानकाे गुनासाे छ । 

अदुवा तथा बेसारखेतीका लागि जिल्लाकै प्रसिद्ध मानिँदै आएको यो पालिकामा प्रायः सबै किसानले अदुवा र बेसार खेती गर्दै आएका छन् । किसानले उत्पादन गरेको अदुवा गाउँकै व्यापारीले सस्तो मूल्यमा किनेर सुठो बनाउन थाले पनि सुठो सुक्न नपाउँदै वर्षा भएका कारण घाटा हुने अवस्थामा पुगेको किसान नरेश मौनीले बताउनुभयो । उहाँका अनुसार अदुवालाई एकदेखि दुई हप्तासम्म चर्को घाममा सुकाएर सुठो बनाइन्छ ।

सुकाएर बनाइएको सुठो वर्षाैँसम्म पनि नकुहिने तथा नबिग्रिने भएकाले किसानले उत्पादन गरेका अदुवा गाउँमै सुठो बनाउन थालिएको थियो । तर, त्यो पनि वर्षा र हिमपातका कारण कुहिने अवस्थामा पुगेपछि किसान चिन्तित भएका छन् ।