जुम्ला – कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा डाक्टर कुटिएको तथा बिरामीले समयमा उपचार नपाएको विषयमा छुट्टाछुट्टै आन्दोलन सुरु भएका छन् ।

प्रतिष्ठानकै कर्मचारीबाट कुटपिट भएका डाक्टर करण साहविरुद्ध बालकलाई उपचार नगराएको भन्दै मुद्दा दर्ता भइ अदालतले पक्राउ पुर्जी जारी गरेपछि कर्णाली स्वास्थ्य विज्ञान प्रतिष्ठान शिक्षण अस्पताल जुम्लाका डाक्टरहरूले आपत्कालीनबाहेकका सेवा बन्द गरेका छन् । उनीहरूले डाक्टर करणविरुद्ध झुटा मुद्दा लगाइएको भन्दै फिर्ता लिन माग गरेका छन् । 

यस्तै डाक्टर साहले आपत्कालीन कक्ष खाली हुँदा पनि बच्चालाई उपचार नगरि पठाएको भन्दै एसिया इन्टरनेशनल स्कुलका बालबालिका तथा अभिभावकले जुम्ला सदरमुकाममा मौन सडक मार्च गरेर विरोध जनाएका छन् । धनबहादुर शाहीको ६ वर्षका छोरा पृथकविक्रमलाई उपचारका लागि प्रतिष्ठानमा लैजाँदा उपचार नभएको विद्यार्थीकाे भनाइ छ ।

डाक्टरमाथि कुटपिट भएको र बच्चाको उपचार गर्न नमानेको छुट्टाछुटै भिडियो सार्वजनिक भएको छ । अस्पतालमा ओपीडी सञ्चालन नहुँदा बिरामीहरू समस्यामा परेका छन् ।