सोलुखुम्बु – नेपाली नयाँ वर्ष २०८० को पहिलो दिन वैशाख १ गते हिमाली जिल्ला सोलखुम्बुकाे सदरमुकाम सल्लेरी बजार सुनसान बनेको छ । सल्लेरी बजार क्षेत्रका स्थानीय, पेसा व्यवसाय गर्ने तथा कर्मचारीहरू नयाँ वर्ष मनाउन अन्यत्र गएसँगै सल्लेरी बजार सुनसान बनेको हो ।

आज शुक्रवार सल्लेरी तथा फाप्लु क्षेत्रका होटल पसलदेखि धेरैजसाे घरको ढोकामा ताला लागेको छ भने नयाँ वर्षको अवसरमा सरकारले सार्वजनिक बिदा दिएकाले सबै कार्यालयहरू पनि बन्द छन् । जसका कारण सधैजसो नागरिकको चहलपहल हुने सदरमुकाम क्षेत्र आज सुनसान छ । सल्लेरी, फाप्लु, नयाँ बजार क्षेत्र पुरै सुनसान छ भने जिल्लाको पर्यटकीय स्थलहरू पत्ताले, पिकेडाँडा, थुक्तेन्छोलिङ, रातनागी, च्याल्सा, लोदिङ मन्दिर, बेनी, गार्मा लगायतका क्षेत्रहरू पर्यटकले भरिभराउ बनेका छन् ।

आजको दिन परिवार, आफन्तजन तथा साथीभाइहरू एकआपसमा भेटघाट गरी रमाइलो गर्ने भएकाले जिल्लाको पर्यटकीय स्थलहरू भरिभराउ बनेका हुन् । साथै कतिपय व्यक्ति वनभोज तथा सहभोजका लागि गाडी नै रिजर्भ गरेर भ्रमणमा निस्किएका छन् । आपसी सद्भाव तथा भाइचराका लागि पनि आफूहरू वनभोजमा आएको वित्तीय कर्मचारी मञ्ज सोलुखुम्बुका अध्यक्ष खगेन्द्र बनले बताउनुभयाे ।  

जिल्लाकाे अर्काे पर्यटकीय क्षेत्र पत्ताले डाँडामा पनि मानिसहरू पुगेका छन् । बिहानैदेखि मौसम अनुकूल हुँदा त्यहाँ पुगेका पर्यटकहरू फोटो खिच्न तथा दृश्य अवलोकनमा व्यस्त बनेका पत्तालेबाट सन्दीप नेपालीले जानकारी दिनुभयाे ।

नयाँ वर्षको अवसरमा जिल्लाका विभिन्न तीर्थस्थलहरूमा मेला लागेकाले त्यहाँ पुग्नेहरूकाे सङ्ख्या पनि धेरै छ । पत्ताले क्षेत्रको गौरी टाप धार्मिक स्थलमा लागेको मेलामा सयौँको सङ्ख्यामा अवलोकनकर्ताहरू पुगेका धार्मिक स्थलका संरक्षक लौरेश्वर बाबाले बताउनुभयाे ।

यस्तै सोलुदुधकुण्ड नगरपालिका ३ तामाखानी लोदिङमा ज्वालामाई मन्दिरमा पनि यस वर्ष नयाँ वर्षको अवसरमा मेला लागेको छ । नयाँ वर्षको अघिल्लो दिनदेखि सुरु भएको मेलामा सोलुखुम्बुको विभिन्न ठाउँसहित छिमेकी जिल्लाहरूबाट पनि अवलोकनकर्ता तथा भक्तजनहरू पुगेका मेला प्रचारप्रसार समितिका संयोजक सन्तबहादुर मगरले जानकारी दिनुभयाे ।