कालीकाेट – कर्णाली राजमार्गमा सडक दुर्घटना बढ्न थालेको छ । २०६२ सालमा ट्र्याक खुलेकाे राजमार्गको सुर्खेत, दैलेख, कालीकोट हुँदै जुम्ला पुग्ने सडक खण्डमा दुर्घटना बढेको हो ।

याे राजमार्गमा बर्सेनि औसतमा दुई हजार जनाभन्दा धेरैले ज्यान गुमाउने गरेका प्रहरीकाे तथ्याङ्कले देखाएको छ । प्रहरीको तथ्याङ्कअनुसार कालीकोट सडक खण्डमा आर्थिक वर्ष २०७७/०७८ मा छ जनाको ज्यान गएको थियो भने २०७८/०७९ मा आठ जनाको ज्यान गएको थियो । यस्तै २०७९/०८० मा १५ जनाको ज्यान गएको छ ।

यो तथ्याङ्क कालीकोट जिल्लाभित्र भएको गाडी दुर्घटनाको हो । कर्णाली राजमार्गको सुर्खेत, दैलेख, कालीकोट, जुम्ला र मुगु खण्डको दुर्घटना तथ्याङ्क हेर्ने हो भने अझै डरलाग्दाे छ । कर्णालीका जिल्लामा सडक पुगे पनि सडकको स्तरोन्नति, समयमै मर्मत र ट्राफिक नियमको पूर्णरूपमा पालना नगर्दा सडक दुर्घटना बढ्दै गएको छ ।

कच्ची सडकमा तीव्र गतिमा गाडी चलाउनु र सडकमा हुने खाल्डोका कारण दुर्घटना बढेको जिल्ला प्रहरी कार्यालय कालीकोटका प्रहरी नायब उपरीक्षक (डीएसपी) जयश्वर रिमालले बताउनुभयो । सडक दुर्घटना कम गर्न निरन्तर अभियान चलाइरहेको पनि उहाँको दाबी छ ।