धनुषा – प्रदेश २ को मन्त्रिपरिषद बैठकले जनकपुर चुरोट कारखाना लिमिटेड(जचुकाली)को परिसरमा रहेको प्रदेश सरकारको सचिवालयलाई मधेश भवन नामाकरण गरेको छ । 

शुक्रबार बसेको मन्त्रिपरिषद बैठकले जचुकाली परिसरभित्र हाल कायम रहेको सचिवालयका भवनहरुलाई मधेश भवन घोषणा गरेको हो ।

यस्तै बैठकले एक महिनाभित्र आवश्यक कर्मचारी पठाउन संघीय सरकारलाई आग्रहसमेत गर्ने निर्णय गरेको छ । प्रदेश सरकार तयार पारेको कर्मचारी संगठनात्मक संरचना (ओएनएम) अनुसारको कर्मचारी एक महिनाभित्र पठाउन संघीय सरकारलाई आग्रह गर्ने निर्णय गरेको हो । एक महिनाभित्र संघीय सरकारले आवश्यक कर्मचारी नपठाए प्रदेश सरकारले आफै व्यवस्था गर्ने निर्णयसमेत मन्त्रिपरिषदको बैठकले गरेको प्रदेश २ का आन्तरिक मामिला तथा कानुन मन्त्री ज्ञानेन्द्र यादवले बताउनुभयो ।
 
यस्तै प्रदेश २ सरकारले आउँदो मंसिरमा हुने रामजानकी विवाह पञ्चमी महोत्सव भव्यताका साथ मनाउन ५० लाख दिने निर्णय समेत गरेको जनाएको छ ।