दाङका तीन वटा मतदान केन्द्रमा दिउँसो १ बजेसम्म मत खसेन

दाङ – दाङका तीन वटा मतदान केन्द्रमा दिउँसो एक बजेसम्म मतदान भएको छैन । बाँके राष्ट्रिय निकुञ्जको मध्यवर्ती क्षेत्रमा पर्ने दाङको बबई गाउँ पालिकाको वडा नम्बर १ मा ६ सय ८६ मतदाता रहेको जिला मतदान केन्द्र, वडा नम्बर ७ मा ५ सय ३० मतदाता रहेको मलैखोला मतदान केन्द्र र दंगीशरण गाउँ पालिकाको वडा नम्बर १ मा ७ सय ५६ मतदाता रहेको कौवाघारी मतदान केन्द्रमा अहिलेसम्म शून्य मतदान रहेको लुम्बिनी प्रदेश निर्वाचन कार्यालय दाङका सूचना अधिकारी गेहेन्द्र कवरले जानकारी दिनुभयो । 

मतदान अधिकृत, कर्मचारी र सुरक्षाकर्मीसहितको टोली १८ गते नै त्यहाँ पुगेर चुनावको तयारी गरेका थिए । दिउँसो १ बजेसम्म कुनै पनि मतदाता मतदान गर्न आएका छैनन् । दाङको क्षेत्र नम्बर ३ मा रहेको बाँके राष्ट्रिय निकुञ्जको मध्यवर्ती क्षेत्रका बासिन्दाले जंगली जनावरको आतंकका कारण आफूहरुको बस्ती स्थानान्तरण गर्नुपर्ने माग गर्दै आएका छन् । गएको २०७९ को निर्वाचनमा पनि मतदान नगर्ने अडान लिएका यहाँका मतदाता नेताहरूको आश्वासनपछि मतदानमा सहभागी भएका थिए ।

आफूहरुको माग सुनुवाइ नभएको भन्दै अहिलेको निर्वाचनमा शून्य मतदान गराउने सामूहिक निर्णयअनुसार मतदानमा सहभागी नभएको बबई गाउँपालिका ७ का वडा सदस्य चन्द्रबहादुर राङुमगरले बताउनुभयो । 
मध्यवर्ती क्षेत्रमा पर्ने दंगीशरण गाउँपालिकाको वडा नम्बर १ को दुई मतदान केन्द्र रहेको कौवाघारी ‘क’ केन्द्रमा मतदान भएको छ भने ख मा अहिलेसम्म मतदान शून्य छ ।