ध्रुवे हात्ती नियन्त्रणका लागि चौबीसै घण्टा अनुगमन

काठमाण्डौ - चितवन राष्ट्रिय निकुञ्जबाट गाउँ पसेको ध्रुवे हात्तीलाई नियन्त्रणमा लिन चौबीसै घण्टा अनुगमन शुरु गरिएको छ । कृषि, वन तथा पर्यावरणमन्त्री गीता चौधरीको निर्देशनमा हात्ती नियन्त्रणका लागि निकुञ्ज, नेपाली सेना र राष्ट्रिय प्रकृति संरक्षण कोषको प्राविधिक टोली परिचालन गरिएको कृषि, वन तथा पर्यावरण मन्त्रालयले जनाएको छ । 

असार २० गते चितवनको भरतपुर महानगरपालिका–२३ बेलहट्टामा ध्रुवे हात्तीको आक्रमणबाट माडी नगरपालिका–१ घर भई हाल बेलहट्टामा बसोबास गर्दै आएकी २५ वर्षीया आशिका बोटे र उहाँका चार वर्षीय छोरा भरतको ज्यान गएको थियो । मन्त्री चौधरीका अनुसार हात्ती निकुञ्जभित्रको उपयुक्त ठाउँमा फेला परेमा डार्ट प्रयोग गरी रेडियो कलर जडान गर्ने तयारी गरिएको छ । रेडियो कलर जडानपछि हात्तीको गतिविधिलाई चौबीसै घण्टा निगरानीमा राखिनेछ । 

मन्त्री चौधरीले हात्ती मध्यवर्ती क्षेत्रका बस्तीमा प्रवेश गर्न लागेको सूचना सम्बन्धित स्थानीयवासीसम्म समयमै पुर्‍याएर आवश्यक सतर्कता अपनाउन पनि आग्रह गर्नुभएको छ । यसैबीच, ध्रुवे हात्तीको आक्रमणमा ज्यान गुमाएकाका परिवारलाई तत्काल राहत उपलब्ध गराइएको मन्त्री चौधरीले जानकारी दिनुभयो । 

घटनाको तीन दिनभित्रै मृतकका परिवारलाई जनही १० लाख रुपैयाँका दरले  २० लाख रुपैयाँ राहत रकम प्रदान गरिएको छ । राष्ट्रिय प्रकृति संरक्षण कोषद्वारा सञ्चालित मानव–वन्यजन्तु द्वन्द्व व्यवस्थापन कोषबाट मृतकका परिवारलाई जनही ५० हजारका दरले थप एक लाख रुपैयाँ उपलब्ध गराइएको मन्त्रालयले जनाएको छ ।