कर्णाली नदीमा गाडी खसेर बेपत्ता भएकामध्ये थप दुई जनाको शव फेला

काठमाण्डौ — कर्णाली राजमार्ग अन्तर्गत दैलेखको चामुण्डाबिन्द्रासैनी नगरपालिका–७, साङ्गेतडामा अघिल्लो हप्ता बिहीवार कर्णाली नदीमा बेपत्ता भएकामध्ये थप २ जनाको शव हिजो बेलुकी फेला परेको छ ।

योसँगै दुर्घटनामा ज्यान गुमाएर सनाखत हुनेको सङ्ख्या तीन पुगेको छ । जिल्ला प्रहरी कार्यालयका प्रमुख एवं प्रहरी नायब उपरीक्षक श्रवणकुमार विकका अनुसार आफन्तले घटनास्थलमा पुगेर शव बुझिसकेका छन् ।

हिजो शव फेला परेकामा कालिकोट पचाल झरना गाउँपालिका–९ का मेखे तिरुवा र कालिकोटकै रास्कोट नगरपालिका–२ की १८ वर्षीया सुजना खड्का रहेका छन् ।  उनीहरूको ठेगाना र विवरण पहिचान भई आफन्तद्वारा सनाखत भइसकेको प्रहरी प्रमुख विकले जानकारी दिनुभयो ।

यसअघि कालिकोटकै पचाल झरना गाउँपालिका–९ का जेखे तिरुवाको शव फेला परेको थियो । अझै गाडी चालक सुर्खेतको पञ्चपुरी नगरपालिका–८ का तुलाराम सुवेदी र उहाँका भाइ (सहचालक) रामु सुवेदीसहित अन्य यात्रुको अवस्था भने अज्ञात छ ।

सुर्खेतबाट कालीकोटतर्फ जाँदै गरेको क.प्र. ०२–००१ ख १०५५ नम्बरको फोर्स गाडी गएको बिहीवार सडकबाट झण्डै ४०० मिटर तल कर्णाली नदीमा खसेको थियो । सशस्त्र प्रहरी बलको गोताखोर टोलीसहितको संयुक्त सुरक्षा निकायले नदी र आसपासका क्षेत्रमा बाँकी बेपत्ताको खोजी गरिरहेको छ ।