मनसुनजन्य विपद् व्यवस्थापन : ‘२६ हजार सुरक्षाकर्मी र आधुनिक प्रविधि परिचालन’

काठमाण्डाै – गृहमन्त्री सुधन गुरुङले मनसुनजन्य विपद् व्यवस्थापन र प्रतिकार्यका लागि सरकारले उच्च सतर्कताका साथ तयारी गरिरहेको जानकारी दिनुभएको छ ।

राष्ट्रियसभाको आजकाे बैठकमा सांसदहरूले उठाएका प्रश्नको जवाफ दिँदै गृहमन्त्री गुरुङले विपद्को समयमा तत्काल परिचालन हुने गरी देशभर २६ हजारभन्दा धेरै सुरक्षाकर्मीलाई तैनाथ अवस्थामा राखिएको बताउनुभयो ।

गृहमन्त्री गुरुङका अनुसार विपद्को समयमा नागरिकलाई सहज सेवा उपलब्ध गराउन नेपाल टेलिकमसँगको समन्वयमा ‘१२३४’ टोल फ्री नम्बर सञ्चालनमा ल्याइएको छ । जोखिमको अवस्थामा यो नम्बरमा फोन गरी सहयोग माग्न सकिने उहाँले बताउनुभयो । विपद् प्रतिकार्यलाई प्रभावकारी बनाउन प्रविधिको प्रयोगमा जोड दिइएको उहाँकाे भनाइ छ ।

विपद् व्यवस्थापनका लागि नेपाली सेनाका ७ हजार ५२४, नेपाल प्रहरीका १० हजार ५७५ र सशस्त्र प्रहरी बलका ८ हजार ११० गरी २६ हजार २१९ जनशक्ति कार्यक्षेत्रमा खटिएका छन् । यसमा १५३ जना गोताखोरसमेत रहेका छन् ।

त्यसैगरी सरकारले १९७ वटा दमकल, ४६० वटा एम्बुलेन्स, ६१२ वटा उद्धार डुङ्गा, १६३ वटा एक्स्काभेटर र १३ वटा पोर्टेबल ब्रिज तयारी अवस्थामा राखेको छ । निजी क्षेत्रसँगको समन्वयमा हेलिकप्टर, र्‍याफ्टिङ र ड्रोन एसोसिएशनसँग पनि सम्झौता गरिएको गृहमन्त्रीले जानकारी दिनुभयो ।

सरकारले जिल्ला प्रशासन कार्यालयहरूलाई उद्धार सामग्री खरिदका लागि ७ करोड ६२ लाख र डुङ्गा खरिदका लागि २८ वटा जिल्लालाई १ करोड ४४ लाख रुपैयाँ निकासा गरिसकेको छ । अहिले प्रदेश, जिल्ला र स्थानीय विपद् व्यवस्थापन कोषमा ७ अर्ब ५६ करोड रुपैयाँ मौज्दात रहेको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणको कार्यकारी प्रमुख नियुक्ति भएसँगै संस्थागत अन्तर अन्त्य भएको र केन्द्रदेखि जिल्ला तहसम्मका कमान्ड पोस्टहरू चाैबीसै घण्टा सक्रिय रहेको गृहमन्त्रीले बताउनुभयो ।