ब्राजिलका भिनिसियस जुनियरद्वारा रियल म्याड्रिडसँग ६ वर्षको सम्झौता

ब्राजिलका विङ्गर भिनिसियस जुनियरले स्पेनिस क्लब रियल म्याड्रिडसँग नयाँ ६ वर्षे सम्झौता गरेका छन् । नयाँ सम्झौताअनुसार उनी अब सन् २०३२ जुन ३० सम्म सान्टियागो बेर्नाबेउमै रहनेछन् ।

२६ वर्षीय भिनिसियसको अघिल्लो सम्झौताको अवधि समाप्त हुन अब एक वर्ष मात्र बाँकी रहेको छ । पछिल्ला केही हप्तायता उनीप्रति इंग्लिस क्लब आर्सनलले पनि चासो देखाएको चर्चा चलेको थियो । तर रियल म्याड्रिडले हिजो मात्रै नयाँ सम्झौताको औपचारिक घोषणा गर्दै दुवै पक्षबीच सहमति भएको जनाएको हो ।

नयाँ सम्झौतापछि भिनिसियसले सामाजिक सञ्जाल इन्स्टाग्राममा ‘बेर्नाबेउमा बिताएका आठ वर्ष निकै छोटा लागे, अब थप छ वर्ष, त्यसपछि सधैंका लागि’ भनेर लेखेका छन् । रियल म्याड्रिडले पनि विज्ञप्तिमार्फत भिनिसियसलाई क्लबको सफल इतिहासका सबैभन्दा महत्वपूर्ण खेलाडीमध्ये एक भएको उल्लेख गरेको छ ।

सम्झौताबारे दुवै पक्षबीच पछिल्लो झण्डै १८ महिनादेखि वार्ता चलिरहेको थियो । केही समय वार्ता रोकिए पनि रियलले नयाँ प्रस्ताव गरेपछि सहमति भएको जनाइएको छ । भिनिसियस सन् २०१८ मा ब्राजिलको फ्लामेङ्गो बाट रियल म्याड्रिड आएका थिए । त्यसयता उनले सबै प्रतियोगितामा ३७५ खेलमा १२८ गोल गरेका छन् ।

ब्राजिलको राष्ट्रिय टोलीबाट उनले ५४ खेलमा १३ गोल गरेका छन् । उनको योगदानमा रियल म्याड्रिडले दुई पटक यूईएफए च्याम्पियन्स लिग, तीन पटक ला लिगा तथा एक पटक कोपा डेल रे उपाधि जितेको छ ।