१२ दिनदेखि अनशनरत विनय यादवकाे जीवन रक्षा गर्न सरकारलाई आयाेगकाे आग्रह

काठमाण्डाै – सुनसरीको देवानगञ्ज घटनाको निष्पक्ष छानबिन, पीडितलाई न्याय तथा नेपाल सरकारसँग भएको सहमति कार्यान्वयनलगायतका माग राख्दै १२ दिनदेखि आमरण अनशनमा रहेका विनय यादवको स्वास्थ्य अवस्थाप्रति राष्ट्रिय मानव अधिकार आयोगले गम्भीर चासो व्यक्त गरेको छ ।

आयोगले आज विज्ञप्ति निकालेर यादवको स्वास्थ्य अवस्था तथा अनशनस्थलमा उपलब्ध स्वास्थ्य उपचारको अवस्थाबारे माइतीघर मण्डलामा पुगेर अनुगमन गरेकाे जनाएको छ । अनुगमनका क्रममा यादवको सुगर र रक्तचाप घट्दै गएको तथा लामो समयको अनशनका कारण स्वास्थ्य अवस्था गम्भीर बन्दै गएको पाइएको आयोगले जनाएको छ ।

अनशन शुरू भएको १२ दिन बितिसक्दा पनि नेपाल सरकारका तर्फबाट यादवको स्वास्थ्य उपचार वा समस्या समाधानका लागि वार्ताको पहल नभएको आयोगको अनुगमनबाट देखिएको विज्ञप्तिमा उल्लेख छ ।

आयोगले अनशनरत व्यक्तिको स्वास्थ्य अवस्थाप्रति संवेदनशील बन्न सरकारलाई आग्रह गर्दै प्रभावकारी स्वास्थ्य उपचारको व्यवस्था गरी यादवको जीवन रक्षा गर्न अपील गरेको छ । त्यसैगरी आयोगले वार्ताको माध्यमबाट यादवले उठाएका माग तथा समस्याको समाधान खोज्न सरकारलाई आग्रह गरेको छ ।