नाइमा एक्स्पोमा टाटाको नयाँ पञ्च ईभी र टियागो ईभी सार्वजनिक

काठमाणडाै – टाटा मोटर्सको आधिकारिक वितरक सिप्रदी ट्रेडिङले काठमाण्डौको भृकुटीमण्डपमा चलिरहेको नाइमा नेपाल मोबिलिटी एक्स्पोमा नयाँ पञ्च ईभी र टियागो ईभी सार्वजनिक गरेको छ ।

नयाँ पञ्च ईभीको मूल्य ३३ लाख ९९ हजार र टियागो ईभीको मूल्य २८ लाख ९९ हजार रुपैयाँ तोकिएको छ । एक्स्पो अवधिभर बुकिङ गर्ने ग्राहकले विशेष अफरअन्तर्गत ३२ लाख ९९ हजार रुपैयाँमै पञ्च ईभी खरिद गर्न सक्ने कम्पनीले जनाएको छ ।

कम्पनीका अनुसार एक्स्पोमा यी दुवै मोडल बुकिङ गर्ने ग्राहकले ११ वर्ष वा २ लाख २० हजार किलोमिटरसम्मको विस्तारित वारेन्टी पाउनेछन् । गाडी सार्वजनिक कार्यक्रममा सिप्रदी ट्रेकिङका प्रमुख कार्यकारी अधिकृत राजनबाबु श्रेष्ठले नेपालमा पछिल्लो प्रविधिसहितका विद्युतीय गाडी भित्र्याउन कम्पनी प्रतिबद्ध रहेको बताउनुभयो ।

उहाँका अनुसार नयाँ पञ्च ईभी र टियागो ईभी नेपाली बजारमा सार्वजनिक गर्नु कम्पनीको यही प्रतिबद्धताको निरन्तरता हो । सिप्रदी ट्रेडिङले विद्युतीय गाडीको बिक्रीसँगै आवश्यक पूर्वाधार विस्तारमा समेत जोड दिँदै आएको जनाएको छ ।

कम्पनीका प्रमुख सञ्चालन अधिकृत राजेशप्रसाद गिरीले ग्राहकलाई विद्युतीय गाडी प्रयोगमा थप विश्वास र सहजता दिलाउन सेवा तथा चार्जिङ पूर्वाधार विस्तार गरिरहेको बताउनुभयो ।

कम्पनीका अनुसार अहिले २१ भन्दा बढी ईभी सर्भिस सेन्टर, ४० वटा डीसी चार्जिङ प्वाइन्ट र १५० भन्दा बढी एसी चार्जिङ प्वाइन्ट सञ्चालनमा छन् ।