नाइमा एक्स्पो : तीन दिनमा ७७ हजारभन्दा बढीको उपस्थिति, १५ सय गाडी बुकिङ

काठमाण्डौ — काठमाण्डौको भृकुटीमण्डपमा गएको मंगलबारदेखि चलिरहेको ‘नाइमा नेपाल मोबिलिटी एक्स्पो २०२६’ मा अवलोकनकर्ताको घुइँचो लागेको छ ।

आयोजक नेपाल अटोमोबाइल्स इम्पोर्टर्स एन्ड म्यानुफ्याक्चरर्स एसोसिएसन (नाइमा) का अनुसार तीन दिनमै ७७ हजारभन्दा बढीले मेला अवलोकन गरेका छन् । तीन दिनमा १५ सय गाडी बुकिङ भएका बिक्रेताहरूको भनाइ छ ।

बुकिङ हुने गाडीमा विद्युतीय गाडीको संख्या धेरै छ । बीवाईडी, टाटा, चेरी ब्रान्डका गाडी सबैभन्दा धेरै बुकिङ भएका छन् । टाटा मोटर्सको आधिकारिक बिक्रेता सिप्रदी ट्रेडिङले एक्स्पो लक्षित गर्दैै टियागो र पन्च ईभी फेसलिफ्ट सार्वजनिक गरेको थियो ।

टियागो ईभी फेसलिफ्टको मूल्य २८ लाख ९९ हजार रुपैयाँ र पन्च ईभी फेसलिफ्टको मूल्य ३२ लाख ९९ हजार रुपैयाँ तोकिएको छ । नाइमा एक्स्पोमा एमजी, ओमोडा, टोयोटा, आइकार लगायत ब्रान्डका गाडी पनि बुकिङ भएका छन् ।

पर्सि आइतबारसम्म चल्ने एक्स्पोमा ५५ भन्दा बढी ब्रान्डका गाडी राखिएका छन् ।