रुकुमपूर्वको मध्य पहाडी लोक मार्गमा आज राति गाडी चलाउन रोक

काठमाण्डौ - रुकुमपूर्वको मध्य पहाडी लोक मार्गमा रातमा गाडी चलाउन प्रशासनले रोक लगाएको छ ।

जिल्ला प्रशासन कार्यालय रुकुमपूर्वका अनुसार मौसम पूर्वानुमान महाशाखाले केही दिन अझै वर्षाको सम्भावना रहेको जनाएको तथा सडकको अवस्था पनि जोखिमपूर्ण रहेकाले जिल्ला सुरक्षा समितिको निर्णयअनुसार रातमा गाडी चलाउन रोक लगाइएको हो ।

सहायक प्रमुख जिल्ला अधिकारी समीर गौतमले निकालेको सूचनाअनुसार आज बेलुका ७ बजेदेखि भोलि शनिवार बिहान ७ बजेसम्म मध्य पहाडी लोकमार्ग भएर चल्ने सबै प्रकारका गाडीलाई रोकिनेछ ।

प्रशासनले दिउँसोको समयमा पनि मौसमको पूर्वानुमान, वर्षाको अवस्था तथा सडकको अवस्थाबारे जानकारी लिएर मात्र यात्रा गर्न सम्बन्धित सबैलाई आग्रह गरेको छ ।