नाइमा मोबिलिटी एक्स्पो : चार दिनमै १ लाखभन्दा बढी अवलोकनकर्ता

काठमाण्डौ — काठमाण्डौको भृकुटीमण्डपमा गएको मंगलबारदेखि शुरु भएको ‘नाइमा नेपाल मोबिलिटी एक्स्पो–२०२६’ ले अवलोकनकर्ताको घुईंचो लागेको छ ।

एक्स्पो शुरु भएको चार दिनमै १ लाख ८ हजारभन्दा धेरैले अवलोकन गरेका आयोजक नेपाल अटोमोबाइल्स इम्पोर्टर्स एन्ड म्यानुफ्याक्चरर्स एसोसिएसन (नाइमा)ले जनाएको छ । आज र भोलि बिदाको दिन अझ धेरै अवलोकनकर्ता आउने अनुमान गर्दै नाइमाले पार्किङ तथा भीड व्यवस्थापनमा विशेष तयारी गरेको जनाएको छ ।

एक्स्पोमा ५५ भन्दा बढी ब्रान्डका गाडी राखिएका छन् । हिजोसम्म विभिन्न कम्पनीले ५२ वटा नयाँ मोडल सार्वजनिक गरेका छन् । एक्स्पोमा विद्युतीय गाडीको ब्याट्री क्षमता, मोटर पावर, रेन्ज, चार्जिङ सुविधा, आफ्टर सेल्स सर्भिस, ब्याट्रीको वारेन्टी तथा ग्यारेन्टी र पुनर्बिक्री मूल्यबारे अवलोकनकर्ताहरुले जिज्ञासा बढी राख्ने गरेका छन् ।

कम्पनीहरूले ग्राहक आकर्षित गर्न नगद छुट, एक वर्षको बिमा, एक वर्षको सवारी कर, निःशुल्क सर्भिसिङ र सहुलियत ब्याजदरमा कर्जालगायत सुविधा दिएका छन् । बैंक तथा वित्तीय संस्था र बिमा कम्पनीहरूले विशेष वित्तीय तथा बिमा योजना उपलब्ध गराएका छन् । भोलिसम्म सञ्चालन हुने एक्स्पोमा स्वदेशी तथा बहुराष्ट्रिय गाडी निर्माता र आयातकर्ताको सहभागिता छ ।