लगनखेलको ऐतिहासिक सप्तपाताल पोखरी पुनर्निर्माणपछि उद्‌घाटन

ललितपुरकाे लगनखेलमा रहेकाे ऐतिहासिक सप्तपाताल पोखरीको पुनर्निर्माण सम्पन्न भई आज उद्घाटन भएकाे छ । ललितपुर महानगरपालिकाका मेयर चिरीबाबु महर्जन, उपमेयर मञ्जली शाक्य बज्राचार्यलगायतले आज पाेखरीकाे उद्घाटन गर्नुभएकाे हाे ।

ललितपुर महानगरपालिका र लगनखेल वातावरण संरक्षण समितिको सहकार्यमा नमूना मच्छिन्द्र माध्यमिक विद्यालयको भवन हटाई पोखरी र पार्क निर्माण भएको हो ।

लिच्छविकालीन इतिहाससँग जोडिएको यो पोखरी कुनै समय झन्डै २०० रोपनीभन्दा धेरै क्षेत्रफलमा फैलिएको थियो । तर अतिक्रमणमा पर्दै पानीविहीन बनेको पोखरीको जग्गा फिर्ता गराउन स्थानीय पूर्ण स्थापितले २०६१ सालमा सर्वोच्च अदालतमा मुद्दा दायर गर्नुभएको थियो ।

झन्डै १५ वर्षको कानूनी लडाइँपछि सर्वोच्चले २०७६ सालमा १४ रोपनी जग्गा पोखरीकै नाममा कायम गर्न आदेश दिएको थियो । त्यसपछि महानगरले पोखरी पुनर्निर्माणको काम अघि बढाएको हो ।

नेपाली सेनाको राजदल गणले प्रयोग गर्दै आएको थप ३२ रोपनी जग्गासमेत फिर्ता ल्याउने प्रक्रिया चलिरहेको  छ । अशोक स्तूप नजिकै रहेको यो पोखरीको पुनर्निर्माणसँगै स्थानीयवासीवासी उत्साहित बनेका छन् ।

महानगरपालिकाकी प्रमुख प्रशासकीय अधिकृत रेखा दास श्रेष्ठका अनुसार याे परियोजना झन्डै ४ करोड ७२ लाख रुपैयाँ लागतमा पुनर्निर्माण भएको हो ।