बाढीका कारण सम्पर्कविहीन भएका ८२६ जनाको खोजी चल्दै

काठमाण्डौ – सरकारले रसुवा बाढीका कारण सम्पर्कविहीन भएका ८२६ जनाको खोजी भैरहेको जनाएको छ ।

गृह मन्त्रालय अन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार अहिलेसम्म १६५ जनाको शव भेटिएको छ । सम्पर्कविहीन भएका ८२६ मध्ये ४४ जना नेपाली सेना, २८ जना प्रहरी, १३ जना सशस्त्र प्रहरी र ५७९ जना पर्यटक रहेका छन् ।

रसुवाका १६१ जना र नुवाकोटका १ जना सम्पर्कविहीन रहेका प्राधिकरणले जनाएको छ । व्यक्तिगत रूपमा गोसाईँकुण्ड तथा रसुवा र नुवाकोट क्षेत्र घुम्न गएकाहरू पनि सम्पर्कविहीन छन् ।

रसुवा र नुवाकोटका स्थानीय बासिन्दा, गाडीका चालक–सहचालक, यात्रु तथा व्यापारी, निजी कम्पनीका कर्मचारीहरू पनि सम्पर्कमा छैनन् । टेलिफोन सेवा अवरुद्ध भएकाले पनि धेरैजनाको अवस्था थाहा हुन सकेको छैन ।

परिवार, आफन्त र साथीभाइहरुले सम्पर्कविहीन भएका आफ्ना मान्छेको खोजी गरिदिन आग्रह गरेका छन् । यस्तै ७३ जना घाइतेको विभिन्न अस्पतालमा उपचार भैरहेको छ । अहिलेसम्म २३९ जनाको हेलिकोप्टरबाट उद्धार गरिएको छ ।