आफन्त खोज्दै प्रहरी र अस्पताल धाउनेहरुको संख्या बढ्दै, शव सनाखतमा समस्या

काठमाण्डौ – गएको बुधबार रसुवाको भोटेकोशी नदीमा आएको भीषण बाढीपछि सम्पर्कविहीन भएका आफन्तको खोजीमा परिवारका सदस्यहरू प्रहरी कार्यालय र अस्पताल धाइरहेका छन् । कसैले मोबाइलमा आफन्तको तस्विर देखाएर सोधीखोजी गर्दैछन् ।

कसैले नाम, ठेगाना र फोन नम्बर टिपाउने गरेका छन् । कोही अस्पतालको सूचीमा आफ्नो मान्छेको नाम खोजिरहेका छन् । अस्पताल परिसरमा पुगेका परिवारले बेपत्ता आफन्तका तस्बिर देखाएर खोजी गरिरहेका छन् । यस्तै बाढीमा परेर ज्यान गुमाएकाहरुको शव व्यवस्थापन र पहिचानमासमेत समस्या हुन थालेको छ ।

रसुवामा फेला परेका शव जिल्ला अस्पताल धुन्चेमा राखिएको छ । धादिङमा संकलन गरिएका शव पोखरा र त्रिवि शिक्षण अस्पतालमा राखिएको छ । नुवाकोटमा फेला परेका शव त्रिवि शिक्षण अस्पतालमा राखिएको छ । चितवनमा फेला परेका शव जिल्ला अस्पताल भरतपुर, नेशनल सिटी अस्पताल, भरतपुर सामुदायिक अस्पताल, नारायणी अस्पताल र औद्योगिक व्यावसायिक विकास प्रतिष्ठानमा राखिएको छ ।

तनहुँमा फेला परेका शव मणिपाल अस्पताल पोखरा, प्रादेशिक अस्पताल दमौली र गण्डकी अस्पताल पोखरामा राखिएको छ । गोरखामा भेटिएका शव प्रदेश अस्पताल गोरखा, गण्डकी अस्पताल पोखरा र नुप अस्पताल गोरखामा राखिएको छ । नवलपरासी सुस्ता पूर्वमा भेटिएका शव मध्यविन्दु नगरअस्पताल चोरमारा, गैँडाकोट नगर अस्पताल, मध्यविन्दु प्रादेशिक अस्पताल, जिल्ला अस्पताल पाल्पा, मिसन अस्पताल पाल्पा, लुम्बिनी अस्पताल पाल्पा र गण्डकी अस्पताल पोखरामा राखिएको छ ।

यस्तै पश्चिम नवलपरासीमा फेला परेका शव पृथ्वी चन्द्र अस्पताल परासी, लुम्बिनी प्रादेशिक अस्पताल बुटवल, भीम अस्पताल भैरहवा र पिपरा अस्पताल कपिलवस्तुमा राखिएको छ ।  तत्काल सनाखत र हस्तान्तरण गर्न कठिन हुने भएपछि अन्तर्राष्ट्रिय मापदण्डअनुसार सबै शवको औँठाछाप र डिएनए नमुना लिन थालिएको छ । ठूलो संख्यामा शव व्यवस्थापनमा समस्या हुने देखिए पनि सरकारले पछि सनाखत गर्न सहज होस् भनेर शवको नमूना लिन थालिएको हो ।