पृथ्वी राजमार्ग एकतर्फी सञ्चालन : बैरेनीमा केही लेदो हटाउन बाँकी

काठमाण्डौ – बाढीलगत्तै अवरुद्ध पृथ्वी राजमार्गमा एकतर्फी गाडी चल्न थालेका छन् । भोटेकोशी र त्रिशूली नदीमा बुधबार आएको बाढीले धादिङको बैरेनीबाट गलौदीसम्म काठमाण्डौ–मुग्लिन सडकमा लेदो थुपारेको थियो ।

धादिङको बैरेनी र गजुरी क्षेत्रमा थुप्रिएको लेदो पन्छाएपछि हिजो बेलुकीदेखि नै सडक एकतर्फी खुलेको हो । अब बैरेनीमा मात्रै केही लेदो हटाउन बाँकी छ । सडक खुलेसँगै राजमार्गमा अलपत्र गाडीलाई गन्तव्यमा पठाइएको छ ।

अहिले तत्काललाई एम्बुलेन्स, सुरक्षाकर्मीसहितका आकश्मिक गाडीलाई मात्र चल्न दिइएको छ । दिउँसोपछि सार्वजनिक गाडी सञ्चालन गर्न दिनेगरी तयारी भैरहेको गजुरी प्रहरीले जनाएको छ ।

 यस्तै रसुवा पनि वैकल्पिक सडक मार्गबाट सडक सञ्जालमा जोडिएको छ । काठमाण्डौको टोखा– छहरे – गड्खार पुल–आप्र–नर्जा–लच्याङ– सरमथली–पाटीखर्क हुँदै बोगटीटार–कालिकास्थानबाट धुन्चे सडकखण्ड सञ्चालन गरिएको हो । त्रिशूलीको बाटो हुँदै रसुवागढी जाने बाटो बाढीले क्षतविक्षत भएपछि वैकल्पिकमार्ग सञ्जालनमा ल्याइएको हो ।