नागढुङ्गा–नारायणगढ सडकमा गाडी चल्न थाले

काठमाण्डौ – भोटेकोशी नदीमा फेरि बाढी आएको सूचनापछि रोकिएको नागढुङ्गा–नारायणगढ सडकखण्डमा गाडी चल्न थालेका छन् ।

आज बिहान भोटेकोशी नदीको बहाव बढेको सूचना प्राप्त भएपछि नागढुंगा–मुग्लिन तथा नारायणगढ–मुग्लिन सडकखण्डमा गाडी सञ्चालनमा रोक लगाइएको थियो ।

नदीमा पानीको बहाव जोखिमपूर्ण नरहेको सूचना प्राप्त भएपछि गाडी सञ्चालनमा आएको गजुरी प्रहरीले जनाएको छ । गाडी चल्न थाले पनि बाढी तथा पहिरोको जोखिम अझै कायमै रहेकाले सतर्क रहेर यात्रा गर्न प्रशासनले आग्रह गरेको छ ।

यात्राका क्रममा जोखिमयुक्त ठाउँमा नबस्न, सम्बन्धित निकाय तथा सुरक्षाकर्मीले दिएका निर्देशनको पूर्ण पालना गर्न र बाढीसम्बन्धी सूचनाबारे नियमित जानकारी लिनसमेत प्रशासनले आग्रह गरेको छ ।