पाकिस्तान : अस्पतालमा १४ नवजात शिशुकाे ज्यान गएकाे घटनामा ८ अधिकारी निलम्बित

पाकिस्तानको राजधानी इस्लामावादमा रहेको एक अस्पतालमा आगलागीमा परेर १४ नवजात शिशुको ज्यान गएपछि ८ जना अधिकारी निलम्बनमा परेका छन् ।

प्रधानमन्त्री शहबाज शरिफले ८ जना अधिकारीलाई निलम्बन गर्दै उनीहरूमाथि फौजदारी कारबाही अघि बढाउन निर्देशन दिनुभएको समाचार संस्था एएफपीले जनाएको छ ।

प्रधानमन्त्रीद्वारा गठित ४ सदस्यीय समितिको प्रारम्भिक प्रतिवेदनअनुसार गएको बुधवार बिहान साढे ६ बजेपछि झन्डै २ मिनेटमै आगलागी शिशु कक्षभर फैलिएको थियो । अस्पतालको निगरानीमा रहेका १५ शिशुमध्ये नर्सले १ जनालाई मात्र उद्धार गर्न सकेकी थिइन् ।

निलम्बित हुनेमा अस्पतालका कार्यकारी निर्देशक, नवजात शिशु विभागका प्रमुख तथा इस्लामावादको आपत्कालीन सेवाका महानिर्देशकसहितका अधिकारी छन् ।

प्रधानमन्त्री शरिफले जिम्मेवार व्यक्तिलाई कुनै छुट नदिइने र उनीहरूलाई कानूनी कारबाहीको दायरामा ल्याइने बताउनुभयो । उहाँले अस्पतालको सुरक्षा व्यवस्थापनको जिम्मा पाएको कम्पनीविरुद्धसमेत कारबाही अघि बढाउन स्वीकृति दिनुभएको खबरमा उल्लेख छ ।

प्रतिवेदनअनुसार आगलागी शुरू भएको झन्डै ६ मिनेटपछि आपत्कालीन सेवालाई जानकारी दिइएको थियो भने पहिलो उद्धार टोली १५ मिनेटपछि घटनास्थल पुगेको थियो । अभिभावक तथा प्रत्यक्षदर्शीहरूले उद्धार कार्य ढिलो भएको र सुरक्षाकर्मीले मानिसहरूलाई भवनबाट बाहिरिन रोकेको आरोप लगाएका छन् ।

अस्पतालमा आगलागी तथा अन्य आपत्कालीन अवस्थासम्बन्धी पर्याप्त सञ्चालन कार्यविधि र तालिमको व्यवस्था नभएको पनि प्रतिवेदनमा उल्लेख छ । आगलागी हुँदा शिशु कक्षामा २ नर्स, १ महिला सुरक्षाकर्मी र अर्का १ कर्मचारी उपस्थित थिए ।

स्वास्थ्यमन्त्री मुस्तफा कमालले यसअघि एअर कन्डिशनरबाट निस्किएको झिल्काका कारण आगलागी भएको हुन सक्ने बताउनुभएको थियो । तर प्रारम्भिक प्रतिवेदनले आगलागीको वास्तविक कारण अझै पुष्टि नभएको जनाएको छ ।

घटनापछि स्वास्थ्य सचिव असलम घोरीलाई पदबाट हटाइएको थियो ।

पाकिस्तानमा कमजोर सुरक्षा मापदण्ड र नियमको फितलो कार्यान्वयनका कारण भवनमा आगलागीका घटना हुने गरेका छन् ।