आज दिउँसो पनि केही ठाउँमा ठूलो वर्षाको सम्भावना

काठमाण्डौ — अहिले गण्डकी र बागमती प्रदेशका एकदुई ठाउँमा हल्का वर्षा भइरहेको छ । मौसम पूर्वानुमान महाशाखाका अनुसार पछिल्लो एक घण्टामा पाल्पामा १६ दशमलव ८ मिलिमिटर पानी परेको छ ।

गएराति देशका पहाडी तथा हिमाली भेगका विभिन्न ठाउँमा मध्यमदेखि ठूलो वर्षा भयो । पछिल्लो ६ घण्टामा लमजुङमा ७७ दशमलव ८ मिलिमिटर पानी परेको छ । त्यस्तै, बागमती, कोशी, कर्णाली र सुदूरपश्चिम प्रदेशका पहाडी तथा हिमाली भू–भागमा हल्कादेखि मध्यम वर्षा भएको छ ।

महाशाखाका अनुसार आज देशका पहाडी भू–भागका साथै बागमती, गण्डकी, लुम्बिनी र सुदूरपश्चिम प्रदेशका तराई भू–भागका एक/दुई ठाउँमा ठूलो पानी पर्ने सम्भावना रहेको छ । ठूलो वर्षाको सम्भावना रहेका क्षेत्रमा बाढी, पहिरो तथा डुबानको जोखिम हुनसक्ने भएकाले आवश्यक सतर्कता अपनाउन महाशाखाले आग्रह गरेको छ ।

यसैबीच लमजुङको चेपे खोलाले सतर्कता तह पार गरेकोले तल्लो तटीय क्षेत्रका नागरिकलाई उच्च सतर्कता अपनाउन बाढी पूर्वानुमान महाशाखाले आग्रह गरेको छ ।