अवरुद्ध राजमार्गको दबाव व्यवस्थापन गर्दै मकवानपुर प्रहरी

काठमाण्डाै – हेटौँडा–काठमाण्डौ सडक खण्डमा यति बेला गाडीको चापसँगै व्यवस्थापनको दबाव बढेको छ ।

त्रिशूली नदीमा आएको बाढीका कारण पृथ्वी राजमार्गअन्तर्गत धादिङको कृष्णभीरमा सडक अवरुद्ध भएपछि काठमाण्डौ आवतजावतका लागि वैकल्पिक मार्ग प्रयोग गर्नुपर्ने बाध्यता छ ।

वैकल्पिक सडकमा गाडी र यात्रुको चाप बढेसँगै मकवानपुर प्रहरीले सडक व्यवस्थापनलाई प्राथमिकतामा राखेको जनाएको छ ।

जिल्ला प्रहरी कार्यालय मकवानपुरका प्रहरी उपरीक्षक श्यामबहादुर खत्री र जिल्ला ट्राफिक प्रहरी कार्यालय मकवानपुरका प्रहरी निरीक्षक रमेश विष्ट आफैँ सडकमा खटिएर आवागमन व्यवस्थापन गरिरहनुभएको छ ।

गाडीको लामो लाइन, साँघुरा सडक र वैकल्पिक मार्गमा बढेको चापकाबीच प्रहरीले निर्धारित रुटअनुसार सञ्चालन गराउने, जाम व्यवस्थापन गर्ने तथा अत्यावश्यक गाडीलाई प्राथमिकता दिने काम गरिरहेको छ ।

प्रशासनले १४ सिटभन्दा कम क्षमताका गाडीका लागि छुट्टै रुट निर्धारण गरेको छ । हेटौँडाबाट काठमाण्डौ छुट्ने ती गाडीले भीमफेदी–कुलेखानी–सिस्नेरी–दक्षिणकाली तथा काठमाण्डौबाट फर्किनेले फर्पिङ–फाखेल–कुलेखानी–भीमफेदी सडक प्रयोग गर्नुपर्नेछ ।

ठूला यात्रुवाहक तथा मालवाहक गाडीलाई काठमाण्डौतर्फ छुट्दा त्रिभुवन राजपथ र फर्किँदा कान्ति लोकपथ प्रयोग गर्न भनिएको छ ।

त्रिभुवन राजपथमा रहेको कमजोर बेलिब्रिजका कारण इन्धन तथा धेरै लोडका गाडी सञ्चालन नगर्न प्रशासनले आग्रह गरेको छ ।

जिल्ला ट्राफिक प्रहरी कार्यालय मकवानपुरका प्रहरी निरीक्षक विष्टले यात्रालाई सहज बनाउने काम भइरहेको बताउनुभएको छ ।

सामान्य अवस्थामा झन्डै ३ घण्टामा पूरा हुने हेटौँडा–काठमाण्डौ यात्रा अहिले गाडीकाे चापका कारण ५ घण्टासम्म लम्बिएको छ ।

– न्युज एजेन्सी नेपाल