पहिरोले अवरुद्ध कर्णाली राजमार्ग खुलाउने प्रयास चल्दै

काठमाण्डौ – पहिरोले क्षति  पुर्‍याएपछि सुर्खेत–जुम्ला सडक खण्डअन्तर्गत कर्णाली राजमार्ग पूर्ण रूपमा अवरुद्ध भएको छ । सडक डिभिजन कार्यालय जुम्लाका अनुसार अस्तिदेखि गगने क्षेत्रमा पहिरो खसेपछि राजमार्ग अवरुद्ध भएको हो ।

सडक खुलाउन मेशिन र प्राविधिक टोली परिचालन गरी अस्ति शनिबार बिहानदेखि निरन्तर काम भइरहेको छ । ठूलो वर्षाका कारण कालिकोटका विभिन्न ठाउँमा सडकमा थप क्षति पुगेको छ ।

एस–मोड क्षेत्रमा ठूला ढुंगा र चट्टान खसेर सडक अवरुद्ध भएको छ भने पिली क्षेत्रमा गेग्रान र माटो बगाउँदा सडकको आधार संरचनासमेत क्षतिग्रस्त भएको कार्यालयले जनाएको छ । सडकको अवस्था जोखिमपूर्ण रहेकाले वैकल्पिक व्यवस्था नभएसम्म यात्रा नगर्न सडक डिभिजन कार्यालयले आग्रह गरेको छ ।

यसैबीच, नरहरिनाथ गाउँपालिका–४ र ५ को सीमामा रहेको जात्ताडा खोलाको काठेपुलबाट खस्दा एक जना पुरुष बेपत्ता भएका छन् । अस्ति शनिबार बेलुकी ६ बजेतिर नरहरिनाथ गाउँपालिका–४ का अन्दाजी २९ वर्षीय प्रेमबहादुर साउद खोलामा खसेर बेपत्ता हुनुभएको हो ।

केही दिनयता परेको अविरल वर्षाका कारण खोलानाला र नदीमा पानीको बहाव बढ्नुका साथै विभिन्न ठाउँमा पहिरो खसेको छ । जोखिमयुक्त क्षेत्रमा नजान र आवश्यक सतर्कता अपनाउन स्थानीय प्रशासनले आग्रह गरेको छ ।