नुवाकोटको देवीघाटमा सेनाले ‘एक्रोब्रिज’ जडानको काम अन्तिम चरणमा पुर्‍यायो

काठमाण्डौ – नुवाकोटको देवीघाटमा नेपाली सेनाले ‘एक्रोब्रिज’ जडानको काम अन्तिम चरणमा पुर्‍याएको छ ।

सडक विभागको सहयोगमा ५५ जना भन्दा धेरै नेपाली सेनाको टोली पुल निर्माणमा जुटेको छ । विदुर नगरपालिका–५ देवीघाट तादी नदीमा पुल निर्माण भैरहेको हो । यो पुलले देवीघाट र बेलकोटगढी नगरपालिका–८ जिलिङ जोड्छ ।

भोटेकोशी नदीको बाढीको बहाव तादीमा पसेर त्यहाँका दुई वटा पक्की पुलमा क्षति गरेपछि नुवाकोटको बेलकोटगढी हुँदै धादिङसँगको यातायात सम्पर्क टुटेको थियो । सम्पर्क सञ्जाल जोड्न ‘एक्रोब्रिज’ निर्माण कार्य भैरहेको हो ।

यो पुलले ७० टन भारवहन क्षमता थेग्न सक्छ । पुल निर्माणपछि देवीघाट तथा आसपासका बस्तीमा आवतजावत र यातायात सेवा सहज हुने अपेक्षा छ ।