विद्यार्थीले सडकमै दाउरामा पकाएर खाए (तस्वीरहरू)

काठमाण्डाै – ग्यास अभावको विरोधमा विद्यार्थीहरूले रत्नराज्य लक्ष्मी क्याम्पस अगाडिकाे सडकमै दाउरामा खाना पकाएर खाएका छन् । हुन् । 

ग्यास अभावको समस्या समाधानका लागि सरकारमाथि दबाव बढाउन अखिल (क्रान्तिकारी) मा आबद्ध विद्यार्थीहरूले आज सडकमै गुन्द्रुक–भात पकाएर खाएका हुन् ।

विद्यार्थी नेता निरज श्रेष्ठले सरकारले ग्यास आपूर्तिका लागि पहल नगरेका कारण २ हप्तादेखि घरमा खाना पकाउन नसकेको बताउनुभयो । उहाँले सरकारले ग्यास नभए खानाको व्यवस्था गर्नुपर्ने माग राख्नुभयो ।

सरकारले नागरिक र व्यापारी दुवैसँग दमनकारी व्यवहार गरिरहेको श्रेष्ठले आरोप लगाउनुभयो । व्यापारीसँग प्रभावकारी समन्वय गरेर सरकारले नागरिकलाई ग्यास वितरण गर्नुपर्नेमा उहाँकाे जोड छ ।

उहाँले भन्नुभयो, ‘घरमा खान नखाएको धेरै दिन भइसक्यो ।  आज यहाँ कलेजबाहिर खाना खान पाइरहेका छौँ । बाहिर ग्यास नपाएपछि हिजो सिंहदरबार गएका थियौँ । ग्यास दिएनन्, प्रहरीले लाठी चार्ज गरेर घाइते बनाएका छन् । सरकारलाई कि त खानाको व्यवस्था गर नभए ग्यास सिलिन्डरको व्यवस्था गर भन्न चाहन्छु । सरकार दमनकारी बनेर अघि बढिरहेको छ ।’

रसुवाको भोटेकोशीमा आएको बाढीका कारण सडक अवरुद्ध भएका कारण आपूर्ति प्रणाली प्रभावित हुँदा काठमाण्डाै उपत्यकामा ग्यास अभाव भएको हो ।

– न्युज एजेन्सी नेपाल