अस्पताल अगाडि सडकपेटीमै बच्चा जन्माउन बाध्य

काठमाण्डाै – सप्तरीको राजविराजमा रहेको गजेन्द्रनारायण सिंह अस्पताल अगाडि सडकपेटीमै एक महिलाले शिशुलाई जन्म दिएको सीसीटीभी फुटेज सामाजिक सञ्जालमा फैलिएको छ ।

राजविराज नगरपालिका वडा नम्बर १४ पर्साहीकी ३० वर्षीया बबिताकुमारी पासवानले गएराति सडकपेटीमै बच्चा जन्माएको भिडियो भाइरल बनेको हो ।

परिवारका अनुसार उहाँलाई सुत्केरी व्यथा लागेपछि अस्पताल पुर्‍याइएको थियो । अस्पतालले रगत परीक्षणका लागि झन्डै ३ हजार २०० रुपैयाँ खर्च लाग्ने बतायो । तर साथमा २ हजार रुपैयाँ मात्र भएका उहाँका श्रीमान् सहयोगको याचना गर्दै अस्पताल बाहिर निस्कनुभयो ।

पैसाको जोहो हुन नसकेपछि र अस्पतालका कर्मचारीले समेत वास्ता नगरेपछि बबिताले झन्डै साढे २ घण्टाको व्यथापछि बिहान साढे ४ बजे सडकपेटीको नालामाथि नै बच्चा जन्माउन बाध्य हुनुभयो ।

शिशु जन्मिएपछि पुनः गाइनो वार्ड पुग्दासमेत अस्पतालका स्वास्थ्यकर्मी र सरसफाइ कर्मचारीले दुर्व्यवहार गर्दै बाहिर निकालेको पीडित परिवारको गुनासो छ । अस्पताल प्रशासनले भने बिरामी पक्ष कसैलाई नभनी आफैँ बाहिरिएको दाबी गरेको छ ।

भिडियो सामाजिक सञ्जालमा फैलिएपछि भने अस्पतालले आमा र शिशुलाई अस्पताल लगेर स्वास्थ्य परीक्षण गरेको छ ।

यसैबीच आर्थिक अभावका कारण महिला सडकमै सुत्केरी हुनुपरेको संवेदनशील घटना आज प्रतिनिधिसभा बैठकमा पनि उठेको छ । राष्ट्रिय स्वतन्त्र पार्टी (रास्वपा) का सांसद खगेन्द्र कर्णले संसद‍्मा घटनाबारे ध्यानाकर्षण गराउँदै सरकारसँग जवाफ माग गर्नुभएको छ ।