पहिरोले थुनिएको सोलुखुम्बुको हुङ्गा खोला बग्न थाल्यो, जोखिम कायमै

काठमाण्डौ – सोलुखुम्बुको महाकुलुङ गाउँपालिकाको हुङ्गा खोलामा पहिरो खसेर बनेको ड्यामबाट पानी बग्न थालेको छ ।

बिहान केहीबेर पुरै थुनिएको खोला अहिले बग्न थालेको हो । महाकुलुङको छिमेकी गाउँपालिका थुलुङ दूधकोशी वडा नम्बर ७ का अध्यक्ष भोजराज कार्र्कीले उज्यालोलाई दिनुभएको जानकारी अनुसार करीब ४० मिटरसम्म पानी जमेपछि अहिले पानी बग्न थालेको छ ।

तर थुनिएको ड्याम भत्कियो भने बाढी आउने जोखिम कायमै रहेको उहाँले बताउनुभयो । हुङ्गा खोला महाकुलुङ र सोताङ हुँदै दुधकोशी नदीमा मिसिन्छ । त्यसैले हुङ्गा तथा दुधकोशी नदीको तटीय क्षेत्रमा नजान र उच्च सतर्कता अपनाउन स्थानीय प्रशासनले आग्रह गरेको छ ।

बाढी पूर्वानुमान महाशाखाले पनि हुङ्गा खोला र दूधकोशी नदी तटीय क्षेत्रमा अर्को सूचना नआउँदासम्म सतर्कता अपनाउन भनेको छ ।