काठमाण्डौ उपत्यकालगायत मुख्य शहरमा खाना पकाउने ग्यासको अभाव झनै चर्को बन्दै

काठमाण्डौ –  काठमाण्डौ उपत्यकामा खाना पकाउने ग्यासको अभावसँगै कालोबजारी बढेको पाइएको छ । नेपाल आयल निगमले प्रहरीसहितको कमान्ड पोस्ट बनाएर शुरु गरेको निगरानीका क्रममा कालोबजारी बढेको पाइएको छ ।

तोकिएको भन्दा बढी मूल्यमा ग्यास बेच्ने व्यापारीहरूलाई सरकारले कारबाही तीव्र पारेको छ । वाणिज्य, आपूर्ति तथा उपभोक्ता संरक्षण विभागले बढी मूल्य लिने ७ वटा पसललाई कारबाही गरेको र दुई जनालाई जनही तीन लाख रुपैयाँसम्म जरिवाना गरेको जनाएको छ ।

उपभोक्ताबाट प्रतिसिलिन्डर ३२ सय रुपैयाँसम्म असुल गरिएको उजुरी परेको छ । भक्तपुरमा २८ देखि २९ सय रुपैयाँसम्म मूल्य लिने दुई पसल सञ्चालकलाई प्रहरीले पक्राउ गरेको छ । ग्यास बिक्रेता महासंघले पनि कालोबजारी गर्नेलाई कडा कारबाही गर्न सरकारसँग माग गरेको छ । भदौ १४ गते कृष्णभीरमा राजमार्ग अवरुद्ध हुँदा चार दिन ग्यास आयात ठप्प भएको थियो ।

त्यसयता, ग्यासका ठूला बुलेट आउन नसक्दा उपत्यका बाहिरका उद्योगमै सिलिन्डर भरेर ट्रकमार्फत ल्याइँदैछ । नेपाल आयल निगमका अनुसार अहिले दैनिक ४० हजारभन्दा बढी सिलिन्डर भित्रिइरहेका छन् ।  तर, अभावको हल्लाले उपभोक्ताले अनावश्यक सञ्चय गर्न थालेपछि बजारमा माग धान्न मुस्किल परेको निगमको दाबी छ ।

ग्यास अभावकै विषयलाई लिएर उद्योगमन्त्रीले राजीनामा दिइसके पनि बजारमा आपूर्ति कहिलेदेखि  सहज हुन्छ भन्ने यकिन जवाफ सरकारसँग छैन । काठमाण्डौ उपत्यकामा ग्यास किन्नका लागि उपभोक्ताहरु नाम टिपाएर कैयौं दिनदेखि पालोमा बसेका छन् भने विभिन्न डिपो तथा उद्योगमा सिलिण्डर लिएर लामो लाइन बसेको देखिन्छ ।