भारतको राजधानी नयाँ दिल्लीमा १८औँ ब्रिक्स शिखर सम्मेलन शुरू

भारतको राजधानी नयाँ दिल्लीमा १८औँ ब्रिक्स शिखर सम्मेलन शुरु भएको छ । यो सम्मेलनमा १० वर्षपछि भारतीय प्रधानमन्त्री नरेन्द्र मोदी, रुसी राष्ट्रपति भ्लादिमिर पुटिन र चिनियाँ राष्ट्रपति सी जिनपिङ भारतमा एउटै मञ्चमा सँगै देखिँदै हुनुहुन्छ ।

सन् २०२० को गलवान झडपपछि पहिलोपटक भारत भ्रमणमा जानुभएका चिनियाँ राष्ट्रपति सी र प्रधानमन्त्री मोदीबीच आज बेलुका बहुप्रतीक्षित द्विपक्षीय वार्ता हुँदैछ । भेटमा लामो समयदेखिको सीमा विवाद र व्यापार लगायतका ६ वटा ठूला मुद्दा सुल्झाउने प्रयास हुने बताइएको छ ।

विश्वको झण्डै आधा जनसङ्ख्या र अमेरिकाभन्दा तीन गुणा ठूलो अर्थतन्त्रको प्रतिनिधित्व गर्ने ११ सदस्य राष्ट्रको यस समूहले डलरको निर्भरता घटाउने रणनीति बनाएको छ । भारतको अध्यक्षतामा भइरहेको यस सम्मेलनमा स्थानीय मुद्रामा व्यापार र अन्तरदेशीय डिजिटल भुक्तानी प्रणालीको विस्तारमा विशेष जोड दिइनेछ ।

सम्मेलनको ‘साइडलाइन’मा प्रधानमन्त्री मोदीले इथियोपिया र मलेसिया लगायत विभिन्न देशका राष्ट्रप्रमुखहरूसँग शृङ्खलाबद्ध द्विपक्षीय वार्ता गर्दै हुनुुहुन्छ । ११ सदस्य राष्ट्रका अतिरिक्त १० साझेदार देशका नेताहरू समेत सहभागी हुने यस सम्मेलनलाई लक्षित गरी नयाँ दिल्लीको सुरक्षा व्यवस्था अत्यन्तै कडा पारिएको छ ।