कृष्णभीरको सडक मंगलबारसम्म खुलाउने गरी काम तीव्र

काठमाण्डौ – त्रिशूली नदीको बाढीका कारण सडक भासिएपछि अवरुद्ध धादिङ चरौँदीको कृष्णभीर सडकखण्ड मंगलबारसम्म सञ्चालनमा ल्याउने गरी काम तीव्र पारिएको छ ।

नागढुङ्गा–मुग्लिङ सडक योजना, पश्चिम खण्डकी योजना प्रमुख सजना अधिकारीकाअनुसार भासिएको सडकको भित्तातर्फबाट नयाँ ट्रयाक निर्माणको काम यसअघि नै सकिएको छ ।

सडक निर्माणका लागि आवश्यक उपकरण तथा निर्माण व्यवसायीको टोली परिचालन गरी धमाधम काम भैरहेको र यही मंगलबारसम्म गाडी चल्ने गरी खुलाउने प्रयास भैरहेको जानकारी दिनुभयो ।

भदौ १० को भोटेकोशी र त्रिशूली नदीको बाढीपछि पहिरो तथा सडक भासिएसँगै कृष्णभीर क्षेत्र अवरुद्ध छ । त्यहाँ नयाँ ट्रयाक निर्माण गरी यातायात सञ्चालन गर्ने गरी सडक योजना कार्यालयले उपकरण परिचालन गरेर काम गर्दै आएको छ ।