हात हल्लाउँदै ट्राफिक व्यवस्थापन गरिरहने अवस्थाको अन्त्य हुनुपर्छ : प्रहरी महानिरीक्षक कार्की

काठमाण्डाै – नेपाल प्रहरीका महानिरीक्षक (आईजीपी) दानबहादुर कार्कीले काठमाण्डाैकाे ट्राफिक व्यवस्थापनलाई प्रविधिमैत्री बनाउन एआई–सक्षम सीसीटीभीलगायतका प्रविधिको प्रयोग बढाउनुपर्ने बताउनुभएको छ । ट्राफिक प्रहरीलाई गाडीकाे बीचमा जोखिम मोलेर उभिएर हात हल्लाउँदै ट्राफिक व्यवस्थापन गरिरहने अवस्थाको अन्त्य गर्दै वैज्ञानिक र व्यवस्थित प्रणाली विकास गर्नुपर्ने उहाँको भनाइ छ ।

आज काठमाण्डाै महानगर प्रहरी बलको ३४औँ वार्षिकोत्सवमा एआईजी कार्कीले बस बिसाैनी, बसपार्क, पार्किङ र समग्र ट्राफिक व्यवस्थापनलाई व्यवस्थित बनाउनुपर्ने बताउनुभयो । उहाँले काठमाण्डाै महानगरपालिकासँग सहकार्य गरेर फुटपाथ व्यवस्थापन, पार्किङ व्यवस्थापन तथा आपत्कालीन उद्धार प्रणालीलाई थप प्रभावकारी बनाउनुपर्नेमा जोड दिनुभयो ।

उहाँले भन्नुभयो, ‘गाडी आवागमनलाई सहज बनाउन ट्राफिक प्रहरी सधैँ सडकको बीचमा जोखिमपूर्णरूपमा उभिएर हात हल्लाउँदै व्यवस्थापन गर्नुपर्ने अवस्थाको अन्त्य गर्दै प्रविधिको प्रयोग बढाउनुपर्छ । एआई–सक्षम सीसीटीभी, व्यवस्थित बस स्टप, बसपार्क, पार्किङ स्टेशन तथा वैज्ञानिक पार्किङ व्यवस्थापनमा जोड दिन आवश्यक छ ।’ 

कार्कीले नेपाल प्रहरी र पालिकाबीच भौतिक संरचना निर्माण तथा सुरक्षा व्यवस्थापनमा सहकार्य भइरहेको उल्लेख गर्नुभयाे । ७५३ वटै पालिकालाई गृह मन्त्रालय, भूमि व्यवस्था, सहकारी तथा गरिबी निवारण मन्त्रालय र सङ्घीय मामिला तथा सामान्य प्रशासन मन्त्रालयमार्फत प्रहरीसँग समन्वय गर्न पत्राचार भइरहेको उहाँकाे भनाइ छ ।

– न्युज एजेन्सी नेपाल