२९ करोड ४४ लाख रुपैयाँमा बिक्यो ट्रम्पको बाल्यकालको घर

अमेरिकी राष्ट्रपति ट्रम्पको बाल्यकालको घर १९ लाख ३० हजार अमेरिकी डलर अर्थात् २९ करोड ४४ लाख रुपैयाँमा बिक्री भएको छ । 

एबीसी न्युजका अनुसार न्युयोर्क शहरमा रहेको ट्रम्पको बाल्यकालको घर मर्मतपछि बिक्री गरिएको हो । ढुसीले भरिएको र मुसाको वासस्थानजस्तो रहेको घरलाई आधुनिक आवासमा रूपान्तरण गरिएको खबरमा उल्लेख छ ।

राष्ट्रपति ट्रम्प ४ वर्षको उमेरसम्म क्वीन्समा रहेको ट्युडर–शैलीको घरमा बस्नुभएको थियो । उहाँका बुबा फ्रेड ट्रम्पले सन् १९४० मा सम्पन्न ‘जमैका एस्टेट्स’ क्षेत्रमा यो घर निर्माण गर्नुभएको थियो । यो घर लामो समयदेखि उहाँहरूको परिवारको स्वामित्वमा छैन ।

बिक्रेता टमी लिनले गएको वर्ष यो घर ८ लाख ३५ डलरमा खरिद गर्नुभएको थियो । लिनले ८ महिनाको अवधिमा घरको मर्मत तथा आधुनिकीकरण गर्न र यसमा आधुनिक सुविधाहरू थप्न ५ लाख डलर खर्च गर्नुभएको खरबमा उल्लेख छ ।

पछिल्ला वर्षहरूमा यो घर धेरै पटक किनबेच भएको छ । सन् २०१७ मा ट्रम्प राष्ट्रपति बन्नुभएकाे केही महिनापछि याे घर २१ लाख ४० हजार डलरमा बिक्री भएकाे थियाे ।

सन् २०१९ मा याे घरलाई २९ लाख डलरको मूल्य तोकेर पुनः बिक्रीका लागि राखिए पनि कसैले किनेनन् ।