टेकुको ऋषेश्वर महादेव मन्दिरमा व्रतालुको घुइँचो

काठमाण्डौ – ऋषि पञ्चमीका दिन आज काठमाण्डाैको टेकुमा रहेको ऋषेश्वर महादेव मन्दिरमा व्रतालुको घुइँचो लागेको छ ।

राति १२ बजेदेखि नै दर्शनका लागि मन्दिर खुला गरिएको छ । काठमाण्डौ महानगरपालिका वडा नं १२ ले मन्दिर तथा त्यसआसपास क्षेत्रका सम्पदास्थलमा सरसफाइ, रङरोगन, सडकबत्ती व्यवस्थापनसहित भीड व्यवस्थापनको काम गरिरहेको छ ।

प्रारम्भिक स्वास्थ्य जाँचसम्बन्धी शिविर सञ्चालन गरिएको छ । आवश्यक परेमा एम्बुलेन्स सेवा तयारी अवस्थामा राखिएको वडाध्यक्ष बालकृष्ण महर्जनले जानकारी दिनुभयो ।

वडाले विभिन्न ५० वटा धार्मिक तथा सामाजिक संस्थाका प्रतिनिधिसँग समन्वय गरी व्रत बसेका महिलालाई मन्दिरमा दर्शनका साथै पञ्चमीको पूजासमेत गराउने व्यवस्था मिलाएको छ ।

आज टेकुदेखि कुलेश्वर र सानेपा निस्कने गाडी सञ्चालनमा रोक लगाइएकाले वैकल्पिक मार्ग प्रयोग गर्न ट्राफिक प्रहरीले सबैलाई आग्रह गरेको छ ।