कृष्णभीरमा गाडी सञ्चालन भएसँगै यात्रुलाई सहज, ग्यास पुरानै मूल्यमा पाइने

काठमाण्डौ – पृथ्वी राजमार्गअन्तर्गत धादिङको कृष्णभीरमा दुईतर्फी गाडी चल्न थालेका छन् ।

जिल्ला प्रशासन कार्यालय धादिङका अनुसार भदौ १० र १४ गते भोटेकोशी नदीमा आएको बाढीका कारण सडक भासिएपछि नयाँ ट्र्याक बनाएर आज बिहानदेखि गाडी चल्न थालेका हुन् । सडक खुलेसँगै देशका विभिन्न ठाउँबाट काठमाण्डौ ओहोरदोहोर गर्ने यात्रुलाई सहज भएको छ ।

ग्यासको बुलेट पनि चल्न थालेकाले अब ग्यासको भाउ २ हजार ६० रुपैयाँ नै कायम हुने नेपाल एलपी ग्यास उद्योग संघले जनाएको छ । यसअघि वैकल्पिक मार्गबाट ढुवानी गर्नुपरेको भन्दै ग्यासको भाउ प्रतिसिलिन्डर १०५ रुपैयाँ ३८ पैसा  बढाइएको थियो ।

तर आजदेखि कृष्णभिरमा नयाँ ट्र्याक खोली राजमार्ग सञ्चालमा ल्याइएकोले ग्यास पुरानै भाउमा पाइने भएको हो । कृष्णभीरको सडक खुलेसँगै ग्यास बुलेटसहितका ठूला गाडीहरु काठमाण्डौ भित्रिन थालेका छन् ।

पृथ्वी राजमार्गका विभिन्न ठाउँमा अझै पनि सडक भासिने, पहिरो जाने तथा ढुंगा–माटो खस्ने जोखिम कायम रहेकाले चालक र यात्रुलाई विशेष सावधानी अपनाउन धादिङ प्रशासनले आग्रह गरेको छ ।

विशेषगरी वर्षा भइरहेको समयमा वा सडकमा पहिरो, ढुंगा तथा अरु अवरोध देखिएमा जोखिम मोलेर यात्रा नगर्न र सम्बन्धित सुरक्षाकर्मी तथा सडक व्यवस्थापनमा खटिएका कर्मचारीको निर्देशन पालना गर्न प्रशासनले भनेको छ ।