१६ वर्षपछि परीक्षण उत्पादनमा राहुघाट जलविद्युत् आयोजना

म्याग्दीको बहुप्रतीक्षित राहुघाट जलविद्युत् आयोजना निर्माण शुरु भएको झण्डै १६ वर्षपछि परीक्षण उत्पादनको चरणमा पुगेको छ ।

३२ मेगावाट क्षमतामा निर्माण शुरु गरिएको आयोजना ठेकेदारको समस्या, ठेक्का रद्द, आयोजना पुनःसंरचना, नयाँ ठेकेदार छनोट, कोरोना महामारी, बाढीपहिरो तथा निर्माण सामग्रीको अभावलगायतका कारण लामो समयपछि उत्पादनको चरणमा पुगेको हो ।

नेपाल विद्युत् प्राधिकरणको सहायक कम्पनी रघुगङ्गा हाइड्रोपावर लिमिटेडले प्रवर्द्धन गरेको ४० मेगावाट क्षमताको आयोजनाका दुवै युनिटको परीक्षण गरिएको छ । आयोजनाका प्रबन्ध सञ्चालक गणेश केसीका अनुसार २०–२० मेगावाट क्षमताका दुईवटै युनिट पूर्ण क्षमतामा सञ्चालन गरी केन्द्रीय प्रसारण प्रणालीमा विद्युत् जोडिएको छ ।

विद्युत् प्राधिकरणसँगको सम्झौताअनुसार १५ दिन परीक्षण उत्पादन गरेपछि आयोजनाबाट व्यावसायिक रूपमा विद्युत् उत्पादन शुरु गर्नेछ । आयोजनाबाट वार्षिक २४ करोड पाँच लाख ९३ हजार ३४ युनिट विद्युत् उत्पादन गर्ने लक्ष्य छ ।

झण्डै डेढ दशकको प्रतीक्षापछि राहुघाट जलविद्युत् आयोजना उत्पादनको चरणमा पुगेसँगै म्याग्दीको जलविद्युत् विकासमा अर्को महत्वपूर्ण अध्याय थपिएको छ ।