काठमाण्डौसहित बागमती क्षेत्रमा दिउँसोपछि मौसम सुधार हुने

काठमाण्डौ – काठमाण्डौसहित बागमती क्षेत्रमा दिउँसोपछि मौसम सुधार हुने भएको छ ।

गएराति चितवन–तनहुँलगायतका मध्य क्षेत्रमा ठूलो वर्षा गराएको प्रणाली फेरि पूर्व अर्थात् (धादिङ–काठमाण्डौ उपत्यका–मकवानपुर–पर्सा) तर्फ फर्किएको छ । यी क्षेत्रका आकाशमा वर्षा गराउने बाक्लो बादल गुजुल्टिएर रहेको हुँदा अब केहीबेरसम्म मध्यमदेखी ठूलो वर्षा हुन सक्ने मौसमका जानकार उज्ज्वल उपाध्यायले सामाजिक सञ्जालमा लेख्नुभएको छ ।

कुलेखानी बाँध तथा बागमतीलगायत उपत्यकाभित्रका नदीमा जलसतह बढ्न सक्छ । काठमाण्डौमा दिउँसोपछि झरी रोकिए पनि पश्चिमी क्षेत्रमा भने दिनभर झरी पर्ने मौसम पूर्वानुमान महाशाखाले जनाएको छ । कोशी र मधेश प्रदेशमा भने हिजोदेखि नै झरी रोकिएको छ ।

देशका सबैजसो क्षेत्रमा भोलिदेखि मात्रै मौसम क्रमशः सुधार हुने मौसमविद् सञ्जिव अधिकारीले बताउनुभएको छ । बङ्गालको खाडीमा विकसित भएको प्रणालीको कारण गएको बुधबारदेखि देशका धेरै ठाउँमा पानी परेको हो ।

अबको ८/१० घण्टा पश्चिम नेपालमा सावधानी अपनाउन, जोखिम क्षेत्रमा सकेसम्म यात्रा नगर्न र नदी तटीय क्षेत्रमा विशेष सावधानी अपनाउन महाशाखाको आग्रह छ ।