नारायणगढ–मुग्लिन सडक खण्ड सञ्चालनमा

काठमाण्डाै – नारायणगढ–मुग्लिन सडक खण्ड सञ्चालनमा आएको छ । अविरल वर्षाका कारण नाम्सीखोला पुलमा थुप्रिएको लेदोसहितको पहिरो हटाएसँगै पोखरा जाने गाडी चल्न थालेका हुन् ।

सडक डिभिजन कार्यालय चितवनका अनुसार दिउँसो १२ बजेपछि यो सडक सञ्चालनमा आएको हो । योसँगै पोखरा–नारायणगढका लागि गाडीहरू आवतजावत गरिरहेका छन् ।

लगातारको वर्षाले गर्दा पृथ्वी राजमार्गको मलेखु–मुग्लिन खण्डका विभिन्न ११ ठाउँमा पहिरो झरेको र पन्छाउन समय लागेकाले याे सडक अवरुद्ध भएको छ ।

नागढुङ्गा–मुग्लिन सडक आयोजना पश्चिम खण्डका सूचना अधिकारी इन्जिनियर सचिन्द्र मिश्रका अनुसार यस सडकको शीलतबजार, बेनिघाट बजार नजिकको गोमती खोलामा लेदोसहितको पहिरोका कारण सडक एकतर्फी सञ्चालनमा आएको छ ।

कृष्णभीर माथिबाट लेदोसहितको पहिरो खसेर सडक अवरुद्ध भएको छ । साथै ज्यामिरेघाट चौकीभीरमा ढुङ्गा र लेदोसहितको पहिरो खस्दा सडक अवरुद्ध भएको छ । फिस्लिङ, चुम्लिङटार र  धारापानीको केही भाग भत्किएका छन् ।

यस्तै बीपी राजमार्गको माम्ती, पिप्ले र चौकीडाँडालगायतका क्षेत्रमा पहिरो जानुका साथै डाइभर्सन नै बगाएकाले आज सञ्चालन गर्न नसकिएको सडक विभागले जनाएको छ ।

कान्ति राजमार्ग, राप्ती राजमार्गको कपुरकोट–खारखोला खण्ड र बेसीशहर–चामे सडक पनि अवरुद्ध छन् ।

पूर्व–पश्चिम राजमार्गअन्तर्गत मकवानपुरको रजैया, मध्यपहाडी राजमार्गको बागलुङ खण्ड र तमोर करिडोरसहित ६ वटा सडक खण्डमा भने एकतर्फी र आंशिकरूपमा गाडी चलिरहेका छन् ।