केही ठाउँमा हल्कादेखि मध्यम वर्षाको सम्भावना, तर ठूलो पानी नपर्ने

काठमाण्डौ – लगातार पाँच दिनको झरीपछि खुलेको मौसम आजदेखि फेरि केही बदली भएको छ ।

मौसम पूर्वानुमान महाशाखाले निकालेको तीन दिने मौसमी बुलेटिनअनुसार पर्सि शनिबारसम्म पहाडी र हिमाली भेगका केही ठाउँमा हल्का वर्षा र हिमपातको सम्भावना छ । तर ठूलो र लगातार वर्षाको सम्भावना भने नरहेको महाशाखाले जनाएको छ ।

त्रिभुवन विश्वविद्यालयको जल तथा मौसम विज्ञान केन्द्रीय विभागका सहप्राध्यापक एवं मौसमविद् विनोद पोख्रेलले अबको एकहप्ता देशका केही ठाउँमा हल्कादेखि मध्यम वर्षाको सम्भावना रहेको बताउनु भएको छ । केही ठाउँमा वर्षाको सम्भावना रहे पनि देशभर एकैपटक वा हरेक दिन लगातार पानी पर्ने अवस्था भने नरहेको उहाँले स्पष्ट पार्नुभएको छ ।

अबको एक–दुई दिन पूर्वी र मध्य नेपालमा वर्षाको सम्भावना तुलनात्मक रूपमा बढी रहे पनि त्यसपछि पहाडी भेगका केही ठाउँमा हल्का वर्षाको सम्भावना रहेको उहाँको भनाइ छ ।

तर किसानले धान काट्ने काम नै रोक्नुपर्ने अवस्था नरहेको र कुन दिन वर्षाको सम्भावना बढी वा कम छ भन्ने हेरेर कृषि कार्यको योजना बनाउन उहाँको सुझाव छ ।