१५ वर्षीय सूर्यवंशी ‘टाइम १०० नेक्स्ट’ सूचीमा

भारतीय क्रिकेटर वैभव सूर्यवंशी अमेरिकाको न्युयोर्क शहरबाट प्रकाशित हुने विश्वप्रसिद्ध समाचार पत्रिका ‘टाइम’ म्यागेजिनको ‘टाइम १०० नेक्स्ट’ सूचीमा परेका छन् ।

टाइम म्यागेजिनले वर्षेनि यस सूचीमा भविष्यको स्वरूप निर्माण गरिरहेका उदीयमान प्रतिभाहरूलाई समेट्छ ।

१५ वर्षीय सूर्यवंशी यस प्रतिष्ठित सूचीमा समावेश हुने एकमात्र भारतीय खेलाडी हुन् । उनी यस सूचीमा स्थान बनाउने सात जना खेलाडीमध्ये एक हुन् ।

सन् २०२४ मा १२ वर्षको उमेरमा बिहारका लागि ‘रणजी ट्रफी’ प्रतियोगितामार्फत प्रथम श्रेणीको क्रिकेटमा डेब्यु गरेयता वैभव सूर्यवंशीको चर्चा र लोकप्रियता तीव्र गतिमा बढेको छ ।

त्यसको केही समयपछि नै सन् २०२५ मा आईपीएल टोली राजस्थान रोयल्सले उनलाई १ करोड भारतीय रुपैयाँमा अनुबन्ध गरेको थियो । उनले आफ्नो पहिलो आईपीएल सिजनमा केवल ७ खेल खेलेर २०६ को स्ट्राइक रेटमा १ शतकसहित २५२ रन बनाएका थिए ।

यस्तै वैभव सूर्यवंशीले आईपीएल २०२६ मा २३७ को स्ट्राइक रेटमा १ शतकसहित ७७६ रन बनाएर ‘ओरेन्ज क्याप’ (सिजनमा सर्वाधिक रन बनाउने खेलाडीको उपाधि) जितेका थिए ।

यस्तै त्यही वर्षको जुलाईमा इङ्ग्ल्यान्डसँगको तेस्रो टी–२० अन्तर्राष्ट्रिय क्रिकेटमा डेब्यु गरेका उनी भारतका लागि खेल्ने अहिलेसम्मकै सबैभन्दा कान्छा खेलाडी बनेका थिए ।