कोरला नाकामा १५० बढी कन्टेनर रोकिए

काठमाण्डौ – चीनबाट सामानसहित आएका १५० भन्दा बढी कन्टेनर कोरला नाकाको न्हेचुङ भन्सारको यार्डमा रोकिएका छन् ।

भन्सार कार्यालयका प्रमुख विदुर चुडालका अनुसार यार्डमा रहेका झण्डै ९० प्रतिशत कन्टेनरको भन्सार जाँचपास भइसके पनि सडक अवरुद्ध हुँदा गन्तव्यतर्फ पठाउन सकिएको छैन ।

बाँकी कन्टेनरको जाँचपास प्रक्रिया पनि दुई दिनभित्र सकिने उहाँले बताउनुभयो । गएको शनिवार रातिदेखि परेको अविरल वर्षाका कारण बेनी–जोमसोम–कोरला सडकखण्डका ४६ ठाउँमा बाढीपहिरो र नदी कटानले क्षति पुर्‍याएको थियो ।

तातोपानी र रसुवागढी नाका बन्द भएपछि वैकल्पिक मार्गका रूपमा प्रयोग हुँदै आएको कोरला नाका पनि सडक अवरुद्ध भएपछि व्यापार प्रभावित भएको भन्सार प्रमुख चुडालले बताउनुभयो ।

दशैँ–तिहार लक्षित सामान आयात हुने समयमा सडक अवरुद्ध हुँदा राजस्व सङ्कलनमा समेत असर परेको भन्सार कार्यालयले जनाएको छ । यसैबीच, वर्षाका कारण पाँच दिनदेखि अवरुद्ध जोमसोम–कोरला सडकखण्ड हिजोदेखि सञ्चालनमा आएको जिल्ला प्रहरी कार्यालय मुस्ताङले जनाएको छ ।

कालीगण्डकी करिडोर, स्थानीय तह र सुरक्षा निकायको पहलमा पहिरो पन्छाएर तथा सडक सफा गरेपछि आवागमन सञ्चालनमा आएको हो ।