अमेरिकाकाे दाेस्राे ठूलाे बैंकलाई १ खर्ब ८४ अर्ब रुपैयाँ जरिवाना

अमेरिकी अर्थ मन्त्रालयले सम्पत्ति शुद्धीकरण निवारण तथा प्रतिबन्धसम्बन्धी कानूनहरूको उल्लङ्घन गरेकोमा ‘बैंक अफ अमेरिका’ लाई १.२१ अर्ब डलर अर्थात् १ खर्ब ८४ अर्ब रुपैयाँभन्दा धेरै जरिवाना गरेको छ ।

अमेरिकी अर्थ मन्त्रालयका अनुसार देशको दोस्रो ठूलो बैंकले ५ अर्ब डलरभन्दा धेरैको शङ्कास्पद कारोबारबारे सरकारलाई जानकारी गराउन असफल रहेको थियो । यसमध्ये १ अर्ब डलर बराबरको कारोबारले राष्ट्रिय सुरक्षा तथा अवैध वित्तीय कारोबारसम्बन्धी जोखिम खडा गरेको मन्त्रालयको भनाइ छ ।

यति ठूलो आकारको बैंकले सम्पत्ति शुद्धीकरण निवारण र प्रतिबन्धसम्बन्धी आफ्ना दायित्वहरू पूरा गर्न असफल हुँदा यसको परिणाम बैंकको दायराभन्दा धेरै परसम्म पुग्ने र सम्पूर्ण अमेरिकी वित्तीय प्रणालीलाई अवैध वित्तीय कारोबारसम्बन्धी गम्भीर जोखिममा पार्ने अमेरिकी अर्थमन्त्री स्कट बेसेन्टले बताउनुभएको बीबीसीले जनाएको छ ।

आफ्नो टोलीले नियामक निकायहरूले उठाएका विषयहरू सम्बोधन गर्न आवश्यक काम पूरा गर्ने दिशामा उल्लेखनीय प्रगति गरिसकेको छ र यसप्रति प्रतिबद्ध रहेको बैंक अफ अमेरिकाले बताएको छ ।

अर्थ मन्त्रालयका अनुसार बैंकले आफ्ना आन्तरिक नियन्त्रण प्रणालीको सट्टा कानून कार्यान्वयन गर्ने निकाय र अन्य वित्तीय संस्थाहरूजस्ता बाह्य पक्षहरूबाट आउने सोधपुछमा अत्यधिक भर परेको थियो ।