२३ वर्षीया अभियानकर्मी थनबर्ग फ्रान्सेली विद्यार्थीको विरोध प्रदर्शनमा सहभागी

स्वीडेनकी जलवायु अभियन्ता ग्रेटा थनबर्ग फ्रान्सेली विद्यार्थीहरूको विरोध प्रदर्शनमा सहभागी हुनुभएको छ ।

२३ वर्षीया थनबर्ग आज बिहान पेरिसको उपनगर सेन्ट–डेनिसमा रहेको आन्दोलनको केन्द्रविन्दु मानिने ’पल एलुअर्ड’ उच्च माध्यमिक विद्यालय पुग्नुभएको हो । छलफलमा युवाहरूलाई नसमेटिएको र उनीहरूको भविष्य उनीहरूबाट खोसिन थालेको उहाँले बताउनुभएकाे छ ।

योसँगै देशभर शैक्षिक संस्थाहरूमा राम्रो सुविधाको माग गर्दै थप प्रदर्शनहरू हुने अपेक्षा गरिएको समाचार संस्था अलजजीराले जनाएको छ ।

प्रदर्शनका क्रममा प्रहरीको ज्यादतीसम्बन्धी अनेकौँ आरोपहरू आएपछि विशेष पोसाक (रोब) लगाएका वकिलहरूले किशोरकिशोरीहरूको सुरक्षाका लागि मानव साङ्लो पनि बनाएका थिए ।

विद्यालय भवनको अवस्था, शिक्षकको अभाव, कक्षाको अत्यधिक व्यस्त तालिका र शिक्षा प्रणालीका अन्य समस्यालगायत विभिन्न विषयमा सुधारको माग गर्दै विद्यार्थीहरूले गएको महिनाको अन्त्यदेखि विरोध प्रदर्शन शुरू गरेका थिए ।

विद्यार्थीहरूले देशभरका सयौँ विद्यालयबाहिर फोहोरका डब्बा थुपारेका छन् र सुरक्षा अवरोधहरू खडा गरेका छन् ।

गएको बिहीवार विरोध प्रदर्शनमा ७० हजारभन्दा धेरै मानिसहरू सडकमा आउका थिए ।

न्याय मन्त्रालयका अनुसार विरोध प्रदर्शनका क्रममा ६ हजार ८०० जनाभन्दा धेरैलाई प्रहरीले नियन्त्रणमा लिएको छ । यसमा मुख्यतया नाबालिगहरू छन् ।

प्रहरीले प्रदर्शनकारीहरूमाथि भएको भनिएको क्रूरतासम्बन्धी २४ वटा आरोपमाथि पनि अनुसन्धान शुरू गरेको छ ।