यात्रुलाई ‘उडुसले टोकेपछि’ उडान रद्द

विमानमा उडुसको प्रकोप देखिएपछि अस्ति शनिवार इटालीबाट अस्ट्रेलिया जाने तय भएको क्वान्टास एअरलाइन्सको उडान रद्द भएको छ ।

सिड्नी मर्निङ हेराल्डका अनुसार शुक्रवारको अघिल्लो उडानका क्रममा—पर्थदेखि रोमसम्मको झन्डै १७ घण्टाको यात्रामा—केही यात्रुले आफूहरूलाई कीराले टोकेको गुनासो गरेका थिए ।

यात्रुहरूलाई उडुसको टोकाइबाट चिलाउने समस्याबाट राहत दिन एन्टिहिस्टामिन औषधि दिइएको थियो, तर पछि त्यो ओषधिको मौज्दात नै सकिएको थियो ।

बोइङ ७८७ ड्रिमलाइनर विमानलाई राम्रोसँग सफा गर्नका लागि उडान स्थगित गर्नुपरेको क्वान्टासका प्रवक्ताले बताएका बीबीसीले जनाएको छ ।

प्रभावित सबै यात्रुलाई बसोबासको व्यवस्था गरिएको र उनीहरूको निर्धारित उडानको ४८ घण्टाभित्रै वैकल्पिक विमानमा पुनः बुकिङ गरिएको एअरलाइन्सले जनाएको छ ।

उडुसका कारण उडान प्रभावित भएकाे याे नयाँ घटना हाेइन । झन्डै दुई हप्ताअघि बेलायतको दक्षिणपूर्वी रेलसेवाका चालकहरूले आफ्ना क्याबिनमा यी कीराहरू भेट्टाएपछि धेरै रेल सेवा रद्द गरेका थिए ।

त्यस्तै सन् २०१७ मा भ्यानकुभरबाट लन्डनतर्फ जाँदै गरेको रात्रिकालीन उडानमा एकै परिवारका सदस्यहरूलाई उडुसले टोकेपछि ब्रिटिश एअरवेजले सार्वजनिक रूपमा माफी मागेको थियो ।

यस्तै गएकाे वर्ष न्युयोर्क टाइम्सले टर्किश एअरलाइन्सका जहाजमा उडुसको उपद्रव र एअरलाइन्सले त्यसलाई बेवास्ता गरेको आरोपबारे समाचार छापेपछि कम्पनीले ठूलो जनसम्पर्क सङ्कटको सामना गर्नुपरेको थियो ।

उडुस साना र पखेटा नभएका परजीवी हुन् जुन कपडा, फर्निचर र ओछ्यानमा बस्न सक्छन् । बेलायतको राष्ट्रिय स्वास्थ्य सेवा (एनएचएस) को वेबसाइटका अनुसार यिनले टोक्दा चिलाउन सक्छ तर यसले सामान्यतया स्वास्थ्यसम्बन्धी गम्भीर समस्याहरू निम्त्याउँदैन ।

तर उडुसबाट छुटकारा पाउन गाह्रो र खर्चिलो हुन सक्छ । यसको उपचारमा ओछ्यानका सामान, लुगाफाटा र पर्दाजस्ता घरायसी सामग्रीहरूलाई तातो पानीमा धोएर ’टम्बल ड्राई’ (मेशिनमा सुकाउने) गर्ने वा प्लास्टिकको झोलामा राखेर तीन–चार दिनसम्म फ्रिजरमा राख्ने जस्ता उपायहरू पर्दछन् ।