फ्रान्सेली सुपरमार्केटका फ्रिजहरूमा साइबर आक्रमण

फ्रान्सका सयौँ सुपरमार्केटहरू साइबर आक्रमणको चपेटामा परेका छन् । आक्रमणका कारण सुपरमार्केटका फ्रिज र फ्रिजरहरू तातेर लाखौँ युरो मूल्य बराबरको ताजा तथा जमेको खाद्य सामग्री बिग्रिएको बीबीसीले जनाएको छ ।

ह्याकरहरूले रेफ्रिजरेशन युनिटहरूको तापक्रम नियन्त्रण गर्ने सफ्टवेयरमाथि नियन्त्रण कायम गर्दा कतिपय युनिटहरूको तापक्रम बढेर ५० डिग्री सेल्सियस पुगेको थियो ।

‘कोअपरेटिभ यू’ का प्रमुख कार्यकारीले आफ्ना धेरैजसो सुपरमार्केटहरू अत्यन्त गम्भीर र अभूतपूर्व आक्रमणको चपेटामा परेको बताउनुभएको छ ।

साइबर आक्रमणबाट ‘कोअपरेटिभ यू’ का १०० भन्दा धेरै सुपरमार्केट निशानामा परेका थिए । यस्तै ‘इन्टरमार्शे’ र यसको ‘नेटो’ ब्रान्डका १८० वटा पसल प्रभावित भए ।

साथै साइबर आक्रमणबाट जोगाउन अरू १०० वटा पसलको इन्टरनेट सम्पर्क तत्काल विच्छेद गरिएको थियो ।

सामान्यतया सुपरमार्केटका फ्रिजरहरूमा रातको समयमा छोटो अवधिका लागि ‘डिफ्रोस्टिङ’ अर्थात् जमेको बरफ पगाल्ने प्रक्रिया चल्छ, त्यस बेला तिनको तापक्रम केही बढ्छ । तर ह्याकरहरूले साइबर आक्रमणकमार्फत ती उपकरणहरूलाई तात्न र तातो अवस्थामा नै रहिरहन दिएका खबरमा उल्लेख छ ।