अबको तीन दिन हिमाली र पहाडी केही ठाउँमा वर्षा तथा हिमपातको सम्भावना

काठमाण्डौ – आज हिमाली तथा पहाडी केही ठाउँमा मेघगर्जन, चट्याङसहित हल्कादेखि मध्यम वर्षा तथा हिमपातको सम्भावना छ । मौसम पूर्वानुमान महाशाखाका अनुसार गण्डकी प्रदेशका पहाडी थोरै ठाउँ तथा अरु पहाडी एक/दुई ठाउँमा वर्षाको सम्भावना धेरै छ ।

हिमाली क्षेत्रका थोरै ठाउँमा पनि वर्षा तथा हिमपातको सम्भावना छ । आज राति कोशी, गण्डकी, कर्णाली र सुदूरपश्चिम प्रदेशका हिमाली एक/दुई ठाउँमा हल्का वर्षा तथा हिमपात हुने अनुमान छ ।

केही दिनदेखि तराईका केही ठाउँमा बिहानी पख सामान्य हुस्सु तथा कुहिरो लाग्न थालेको छ । महाशाखाका अनुसार भोलि कोशी, बागमती र गण्डकी प्रदेशका पहाडी क्षेत्रका एक/दुई ठाउँमा मेघगर्जन र चट्याङसहित हल्का वर्षा तथा हिमपातको सम्भावना छ ।

पर्सि आइतवार देशका हिमाली क्षेत्र तथा कोशी, बागमती र गण्डकी प्रदेशका पहाडी एक/दुई ठाउँमा मेघगर्जन र चट्याङसहित हल्का वर्षा तथा हिमपातको सम्भावना रहेको महाशाखाले जनाएको छ ।